जुन्या किमती प्रमाणे साडेतीन लाखांचा ऐवज लंपास
सुरेश पाचभाई | मारेगाव
मारेगाव शहर पुन्हा एकदा घरफोडीच्या घटनेने हादरले असून, वार्ड क्रमांक १४ मध्ये अज्ञात चोरट्यांनी साधलेल्या डावामुळे नागरिकांमध्ये भीतीचे वातावरण निर्माण झाले आहे. भरदिवसा घराला केवळ कुंडी लावल्याचा फायदा घेत चोरट्यांनी थेट घरात प्रवेश करून सोन्या-चांदीसह रोख रक्कम असा तब्बल अंदाजे जुन्या किंमती प्रमाणे ३ लाख ३१ हजार ९९० रुपयांचा मुद्देमाल लंपास केल्याची खळबळजनक घटना उघडकीस आली आहे.
फिर्यादी सुशील दत्तात्रय जंगेवार (वय ४२) हे स्थानिक विविध कार्यकारी सहकारी संस्थेत कार्यरत असून कुटुंबासह वास्तव्यास आहेत. नातेवाईकांच्या कार्यक्रमानिमित्त काही दिवसांपूर्वी त्यांनी मौल्यवान दागिने सुरक्षिततेसाठी मामाकडे ठेवले होते. ४ एप्रिल रोजी ते दागिने परत आणण्यात आले होते.
मात्र ६ एप्रिल रोजी दुपारच्या सुमारास फिर्यादींची पत्नी मंदिरात जाताना घराला कुलूप न लावता केवळ कुंडी लावून गेली. याच क्षणाची अचूक साध साधत अज्ञात चोरट्यांनी घरात प्रवेश केला आणि पर्समध्ये ठेवलेले सुमारे १५.५ तोळे सोनं, ९ तोळे चांदी व ११ हजार रुपये रोख रक्कम असा ऐवज चोरून नेला. ७ एप्रिल रोजी सायंकाळी ही चोरी उघडकीस येताच परिसरात एकच खळबळ उडाली.
या प्रकरणी मारेगाव पोलीस ठाण्यात भारतीय न्याय संहिता कलम ३०५ (a) BNS अंतर्गत गुन्हा दाखल करण्यात आला असून, ठाणेदार श्याम वानखेडे यांच्या मार्गदर्शनाखाली पोलीस उपनिरीक्षक प्रविण सुळे व पोलीस हवालदार शंकर बारेकर तपास करत आहेत.
