बातमी ऐका (Marathi Voice Reader)
सांगली: गेल्या काही काळापासून सांगलीत चोरीच्या घटना वाढत असल्याचे चित्र आहे. आता चोरट्यांनी कहरच केला असून एचडीएफसी बँकेचं एटीएम मशीनच लांबवलं. सांगलीवाडीतील डॉ. पतंगराव कदम कॉलेजसमोर ही खळबळजनक घटना घडली. या मशीनमध्ये 10 लाख 34 हजार रुपयांची रोकड होती. याप्रकरणात एनसीआर कार्पोरेशन इंडिया प्रा. लि. चे स्थानिक प्रतिनिधी विकास आमनगी यांनी शहर पोलीस ठाण्यात फिर्याद दिली असून पोलीस अधिक तपास करीत आहेत.
पोलिसांकडून मिळालेल्या माहितीनुसार, बेंगळुरू येथील एनसीआर कार्पोरेशन इंडिया प्रा. लि. या कंपनीकडून वेगवेगळ्या जिल्ह्यांत बँकेची एटीएम मशीन्स बसवली जातात. कंपनीकडून सांगली जिल्ह्यात देखील 40 एटीएम मशीन बसवण्यात आल्या आहेत. त्यातील सांगली शहरात 35 मशीन आहेत. मात्र, एकाही एटीएम केंद्रात सुरक्षारक्षक नियुक्त केलेला नाही.
‘तू लई नियमानं वागतोस…’; 6 कैदी थेट केबिनमध्ये घुसले, तुरुंग अधिकाऱ्यालाच…, कोल्हापूरच्या कळंबा कारागृहात भयंकर थरार
एटीएम मशीनच पळवलं
मंगळवारी मध्यरात्रीनंतर चोरटे एटीएम समोर आले आणि सुरक्षारक्षक नसल्याचे पाहून आत घुसले. वायरी तोडून थेट मशीन घेऊनच पसार झाले. बुधवारी सकाळी गावातील एटीएम केंद्रातून मशीन चोरीला गेल्याचे समजले. अज्ञात चोरट्यांनी एटीएम मशीनच पळवल्याने परिसरात खळबळ उडाली. तेव्हा घटनास्थळी नागरिक गोळा झाले.
दरम्यान, बँकेच्या अधिकाऱ्यांना हा प्रकार कळवण्यात आला. त्यानुसार 10 लाख 34 हजार 800 रुपयांची रोकड आणि दीड लाखांचे एटीएम मशीन असा एकूण 11 लाख 84 हजारांचा मुद्देमाल चोरल्याप्रकरणी सांगली शहर पोलिसांत गुन्हा दाखल झाला आहे.
पुन्हा एटीएम चोरी…
सांगली जिल्ह्यांत एटीएम चोरीच्या घटना वाढल्या आहेत. काही काळापूर्वीच मिरज तालुक्यातील बेडग – आरग रस्त्यावरील खासगी बँकेचे एटीएम मशीन चोरट्यांनी जेसीबीच्या सहाय्याने उखडून पळवून नेले होते. मशीनमध्ये सुमारे 27 लाख रुपयांची रोकड होती. बुधगाव (ता. मिरज) येथे गॅस कटरने एटीएम फोडून सुमारे 17 लाख 40 हजार रुपयांची रोकड लंपास केली होती. तर डफळापूर (ता. जत) येथे मोटारीला दोरी बांधून एटीएम मशीन ओढण्याचा प्रयत्न झाला होता. आता सांगलीवाडीत मशीनच पळवल्याने खळबळ उडाली आहे.
