बातमी ऐका (Marathi Voice Reader)
नाशिकमधील वादग्रस्त भोंदूबाबा अशोक खरातला एका महिलेला लग्नाचे आमिष दाखवून तिचे लैंगिक शोषण केल्याच्या चौथ्या गुन्ह्याप्रकरणी आज पुन्हा नाशिक सत्र न्यायालयात हजर करण्यात येणार असून, या प्रकरणात पोलिस त्याची पुन्हा कोठडी मागण्याची दाट शक्यता आहे. दरम्यान, या घडामोडींच्या पार्श्वभूमीवर खरातची सासू पार्वती शिंदे यांनी एका वृत्तवाहिनीशी बोलताना या प्रकरणावर प्रतिक्रिया दिली आहे. पार्वती शिंदे म्हणाल्या, मी एक महिन्यापासून इथे आली आहे. काय चौकशी होते आम्हाला काही माहिती नाही. कल्पना कुठे आहे मला माहिती नाही. तिच्याशी फोनवर बोलणे झाले नाही. हे कधी थांबेल सांगता येत नाही. अशोक खरात काय करायचा माहीत नाही. अधिकारी कुटुंबीयांसोबत चौकशी करत आहेत. माझी चौकशी झाली नाही. मला काहीच माहिती नाही. मी शिक्षित नाही, मला नीट बोलताही येत नाही. अशोक खरातने केलेल्या कारनाम्यावर प्रश्न विचारला असता पार्वती शिंदे म्हणाल्या, तो जात होता, त्याच्या ऑफिसमध्ये तिकडे जाऊन काय करायचा माहिती नाही. मला आणि कल्पनाला काहीच माहिती नव्हते. तसेच त्याला शिक्षा व्हायला पाहिजे का? असे विचारले असता त्या म्हणाल्या, शिक्षा नाही व्हायला पाहिजे, पण आता त्याला कोण सोडवणार? असेही त्यांनी म्हटले. शिर्डी पोलिस ठाण्यात फसवणुकीचा गुन्हा दाखल झाल्यापासून फरार असलेली भोंदूबाबा अशोक खरातची पत्नी कल्पना खरात गेल्या 15 दिवसांपासून पोलिसांना गुंगारा देत असून, तिचा शोध घेण्यासाठी आता तपास यंत्रणांनी तपासाची चक्रे वेगवान केली आहेत. पोलिसांनी कल्पनाच्या माहेरी, नातेवाईकांकडे, नाशिकमधील मैत्रिणींकडे आणि तिच्या घरी काम करणाऱ्या आजी-माजी नोकरांकडेही सखोल चौकशी केली आहे. मात्र अद्याप कोणताही ठोस पुरावा हाती न लागल्याने पोलीस पथकाकडून तिचा कसून शोध सुरूच आहे.
