बातमी ऐका (Marathi Voice Reader)
खासदार धैर्यशील मोहिते-पाटील यांच्या सततच्या पाठपुराव्यामुळे अखेर टेंभुर्णी- पंढरपूर हा चार पदरी महामार्ग होणार असल्याची घोषणा केंद्रीय रस्ते वाहतूक व महामार्ग मंत्री नितीन गडकरी यांनी केली आहे. फलटण ते पंढरपूर पालखी मार्गाच्या पाहणी दौऱ्यावर असताना केंद्रीय रस्ते वाहतूक व महामार्ग मंत्री नितीनजी गडकरी यांनी ही घोषणा केली. टेंभुर्णी ते पंढरपूर या महामार्गावरील वाढती वाहतूक, वारकऱ्यांची मोठी संख्या, त्यातून अपघातांचे वाढते प्रमाण व वाहतूक कोंडी यामुळे या राष्ट्रीय महामार्गाच्या क्रमांक ५६१ ए च्या चौपदरीकरणासाठी खा. धैर्यशील मोहिते पाटील यांनी दिल्लीत अनेकवेळा भेटून तसेच दि. २० मे रोजी निवेदन देऊन नितीन गडकरी यांच्याकडे मागणी केली होती. त्याची दखल घेत केंद्रीय मंत्री गडकरी यांनी टेंभुर्णी- पंढरपूर महामार्गाच्या चौपदरीकरणासाठी डीपीआर तयार करण्यासाठी निविदा प्रक्रिया सुरू करण्यात आल्याचे पत्राने खा. मोहिते पाटील यांना कळवले होते. डीपीआर अहवालानुसार पुढील कार्यवाही करण्यात येणार असल्याचेही त्यामध्ये नमूद केले होते. कारखान्यांसाठी महत्त्वाचा पंढरपूर हे देशातील प्रमुख तीर्थक्षेत्रांपैकी एक असून आषाढी व कार्तिकी वारीदरम्यान लाखो भाविक येथे येतात. तसेच हा मार्ग एन एच ६५ आणि एन एच ९६५ यांना जोडणारा महत्त्वाचा दुवा आहे. अनेक गावं, बाजारपेठा आणि साखर कारखान्यांसाठीही अत्यंत महत्त्वाचा आहे. या महामार्गाच्या चौपदरीकरणामुळे वाहतूक सुलभ होऊन अपघातांचे प्रमाण कमी होण्यास मोठी मदत होणार आहे.
