मॉर्निंग वॉकदरम्यान चिमुरडीवर बिबट्याची झडप:आरडाओरड ऐकताच नागरिक धावले, चिमुरडीचा जीव थोडक्यात बचावला

पुणे जिल्ह्यातील जुन्नर तालुक्यात पुन्हा एकदा बिबट्याच्या हल्ल्याने खळबळ उडाली आहे. ओतूर परिसरातील वाकचौरे मळा येथे गुरुवारी पहाटे 10 वर्षीय मुलीवर बिबट्याने हल्ला केल्याची धक्कादायक घटना घडली. काव्या महेंद्र वाकचौरे असे जखमी मुलीचे नाव असून या हल्ल्यात ती गंभीर जखमी झाली आहे. या घटनेनंतर संपूर्ण परिसरात भीतीचे वातावरण निर्माण झाले असून ग्रामस्थांमध्ये प्रचंड दहशत पसरली आहे. मिळालेल्या माहितीनुसार, गुरुवारी सकाळी सुमारे 6 वाजण्याच्या दरम्यान काव्या आपल्या बहिणीसोबत घराजवळ मॉर्निंग वॉक करत होती. त्याचवेळी दबा धरून बसलेल्या बिबट्याने अचानक तिच्यावर झडप घातली. बिबट्याने हल्ला करताच काव्याने मोठ्याने आरडाओरडा केला. तिचा आवाज ऐकताच परिसरातील नागरिक तातडीने घटनास्थळी धावून आले. नागरिकांचा गोंधळ आणि ओरड सुरू झाल्यानंतर बिबट्याने जंगलाच्या दिशेने पळ काढला. या हल्ल्यात काव्याच्या शरीरावर गंभीर जखमा झाल्या असून तिला तातडीने ओतूर येथील प्राथमिक आरोग्य केंद्रात दाखल करण्यात आले. दरम्यान, या घटनेनंतर स्थानिक ग्रामस्थांनी प्रशासनावर संताप व्यक्त केला आहे. ओतूर येथे 14 कोटी रुपये खर्चून उभारण्यात आलेले ग्रामीण रुग्णालय अद्याप सुरू झाले नसल्याने जखमी मुलीच्या उपचारासाठी मोठी गैरसोय झाल्याचा आरोप नागरिकांनी केला. रुग्णालयात डॉक्टर आणि कर्मचाऱ्यांची नियुक्ती नसल्याने ग्रामस्थांनी प्रशासनाच्या निष्क्रियतेवर प्रश्न उपस्थित केले आहेत. सामाजिक कार्यकर्ते अशोक सखाराम अहिनवे आणि मुलीच्या पालकांनी घटनेची माहिती वनविभागाला दिल्यानंतर वनाधिकारी घटनास्थळी दाखल झाले. कायमस्वरूपी उपाययोजना कराव्यात, अशी मागणी वाकचौरे मळा परिसरात गेल्या काही दिवसांपासून बिबट्यांचा वावर वाढल्याचा दावा ग्रामस्थांनी केला आहे. त्यामुळे नागरिकांमध्ये भीतीचं वातावरण निर्माण झालं असून लहान मुलांना घराबाहेर पाठवण्यासही पालक घाबरत आहेत. वनविभागाने तातडीने परिसरात पिंजरा लावून बिबट्याला जेरबंद करावे, तसेच नागरिकांच्या सुरक्षेसाठी कायमस्वरूपी उपाययोजना कराव्यात, अशी जोरदार मागणी ग्रामस्थांकडून करण्यात येत आहे. या घटनेनंतर जुन्नर परिसरातील वनविभागाच्या कामकाजावरही प्रश्नचिन्ह उपस्थित केले जात आहे.