मुंबईच्या महापौर रितू तावडे यांनी जैनमुनी नम्रमुनी यांच्या चमत्कारामुळे आपली घशाची समस्या दूर झाल्याचा दावा केला आहे. भोंदू अशोक खरातच्या काळ्या कारनाम्यांमुळे अवघ्या महाराष्ट्रात अंधश्रद्धेविरोधात संतापाची लाट उसळली असताना त्यांनी हे विधान केल्यामुळे विरोधकांनी त्यांच्यावर टीकेची झोड उठवली आहे. खासदार संजय राऊत यांच्यानंतर आता मुंबईच्या माजी महापौर किशोरी पेडणेकर यांनी देखील निशाणा साधला आहे. किशोरी पेडणेकर म्हणाल्या, महापौर रितू तावडे यांना प्रत्येक भाषणानंतर सारवासारव करावी लागत आहे. असे नेहमीच का होत आहे? सध्या अशोक खरातमुळे वातावरण गरम असताना रितू तावडे मुनींसमोरच तुमच्यामुळे माझा घसा बरा झाला, असे म्हणाल्या. ॐ च्या उच्चारात प्राणायाम आहे. आपण एकदा प्राणायाम सुरू केला की ठीक व्हायला 2 वर्षे लागत नाहीत. आपल्या स्वरनलिकेवर दाब येऊन घर्षण होऊन आजार बरा होतो. मी त्या गुरुजींचा आदर करते पण आपण एकदा काही बोलतो त्याला सारवा सारव करावी लागू नये, असे म्हणत पेडणेकर यांनी तावडेंचे कान टोचले आहेत. सुषमा अंधारेंचा टोला शिवसेना ठाकरे गटाच्या नेत्या सुषमा अंधारे यांनी देखील ट्विट करत रितू तावडे यांनी केलेल्या विधानावर भाष्य केले आहे. अंधारे म्हणाल्या, राजकारणातील महत्त्वाच्या पदावर असणाऱ्या व्यक्तींनी अत्यंत जबाबदारीने वागलं बोलल पाहिजे कारण त्यांचा वर्तनव्यवहार हा सामान्य जनतेसाठी पथदर्शी असतो. रितूजी तुमच्या श्रद्धेचा आदरच मात्र समस्त मुंबईकरांच्या घशाची काळजी घेण्यासाठी मुंबईकरांना स्वच्छ पाणीपुरवठा आणि शुद्ध हवेची जास्त गरज आहे. तुमची महापौरपदी निवड सुद्धा नेमकी याच कामासाठी झाली आहे हे तुम्हाला आठवत असेलच, असा खोचक टोला अंधारे यांनी लगावला आहे. …तर अजून एक खरात जन्माला येईल- संदीप देशपांडे मनसे नेते संदीप देशपांडे यांना रितू तावडे यांच्या विधानावर प्रश्न विचारला असता ते म्हणाले, चांगले आहे. असे आशीर्वादाने गळे बरे होत असतील तर अजून एक खरात जन्माला येईल, अशी प्रतिक्रिया त्यांनी दिली आहे. गुरुदेवजींच्या आशीर्वादाने रितू तावडे महापौर- मंत्री लोढा दरम्यान, गुरुजींच्या आशीर्वादाने रितू तावडे महापौर झाल्याचे वक्तव्य मंत्री मंगलप्रभात लोढा यांनी केले आहे. ते म्हणाले, गुरुदेवजींची भेट घेतल्यामुळे आणि मुख्यमंत्री देवेंद्र फडणवीस, गृहमंत्री अमित शहा यांच्या आशीर्वादामुळे रितू तावडे मुंबईच्या महापौर होऊ शकल्या, असे वक्तव्य लोढा यांनी केले आहे.
