बातमी ऐका (Marathi Voice Reader)
गिरिप्रेमीच्या एव्हरेस्ट मोहिमेने 21 मे रोजी पहाटे जगातील सर्वोच्च माऊंट एव्हरेस्ट (8,848.86 मीटर) शिखरावर यशस्वी चढाई केली. नेपाळमधील पारंपरिक साऊथ कोल मार्गाने ही मोहीम पूर्ण झाली. 2012 आणि 2013 नंतर गिरिप्रेमीची ही तिसरी यशस्वी एव्हरेस्ट मोहीम ठरली आहे. ज्येष्ठ गिर्यारोहक उमेश झिरपे यांच्या नेतृत्वाखालील या मोहिमेत विवेक शिवदे, मिहिर जाधव आणि अखिल काटकर यांनी शिखर सर केले. त्यांच्यासोबत लाक्पा शेर्पा, उर्गेन शेर्पा आणि लाक्पा तेनजी शेर्पा हे शेर्पा गिर्यारोहकही होते. 2 एप्रिल 2026 रोजी पुण्यातून निघालेल्या या पथकाने जवळपास आठ आठवडे एव्हरेस्ट परिसरात राहून वातावरणाशी जुळवून घेण्याची प्रक्रिया पूर्ण केली. यात लोबुचे ईस्ट शिखर चढाई आणि एव्हरेस्टवरील कॅम्प 2 पर्यंतच्या फेऱ्यांचा समावेश होता. अंतिम शिखर चढाई मोहिमेला सुरुवात झाल्यानंतर पथकाने उच्च कॅम्पमार्गे शिखराकडे कूच केली. यंदा हवामान अनुकूल असले तरी, गिर्यारोहकांना ‘डेथ झोन’मध्ये (8000 मीटरवरील कमी प्राणवायू असलेले क्षेत्र) सलग 10 तासांहून अधिक काळ चढाई करावी लागली. आरोग्याच्या कारणांमुळे संघातील सदस्य निकुंज शहा यांनी कॅम्प 4 च्या खालील भागातून परतण्याचा निर्णय घेतला. एव्हरेस्ट बेस कॅम्पवरून मोहिमेचे समन्वय करणारे नेते उमेश झिरपे म्हणाले, ‘यंदा एव्हरेस्टवरील हवामानाची संधी खूपच कमी होती. जेट स्ट्रीम्समुळे शिखर चढाईसाठी मर्यादित वेळ होता. अशा परिस्थितीत योग्य वेळ साधत सुरक्षितरीत्या शिखर चढाई पूर्ण करणे हे मोठे आव्हान होते, जे संघाने यशस्वीपणे पार केले. हवामानाची साथ मिळाली, पण या यशामागे संघाची शिस्त, संयम, मानसिक ताकद आणि टीमवर्क अधिक महत्त्वाचे ठरले.’
या यशस्वी मोहिमेसह उमेश झिरपे यांनी आता एकूण 18 गिर्यारोहकांना एव्हरेस्ट शिखरावर नेण्याचा मान मिळवला आहे. ही मोहीम भारत सरकारच्या ‘फिट इंडिया’ अभियानाला पाठिंबा देणारी असून शारीरिक तंदुरुस्ती, मानसिक सक्षमता आणि सक्रिय जीवनशैलीचा संदेश देणारी ठरली. जबाबदार गिर्यारोहण, हिमनद्या संवर्धन आणि हवामान बदलाबाबत जनजागृती हाही मोहिमेचा महत्त्वाचा उद्देश होता. या मोहिमेच्या यशस्वी नियोजन आणि अंमलबजावणीमध्ये नेपाळस्थित पीक प्रमोशन एजन्सीचेही महत्त्वपूर्ण सहकार्य लाभले. त्यांनी आवश्यक समन्वय आणि लॉजिस्टिक सहाय्य प्रभावीपणे पुरवले.
