हिंगोली जिल्हा परिषदेच्या विविध कार्यालयांमधून कर्मचाऱ्यांची तपासणी केल्यानंतर १३ जणांकडे गुटखा व तंबाखुच्या पुड्या आढळून आल्या आहेत. तर हे कर्मचारी कार्यालयात काम करीत असताना गुटखाचे सेवन करीत असताना आढळून आल्याने त्यांच्यावर दंडात्मक कारवाई करण्यात आली आहे. या कारवाईमुळे जिल्हा परिषदेमध्ये खळबळ उडाली आहे. हिंगोली जिल्ह्यात गुटखा बंदी असतांनाही अनेक ठिकाणी गुटखा विक्री होत असल्याने पोलिस विभागाने पानटपऱ्यांची तपासणी करून कारवाई सुरु केली आहे. या कारवाईमुळे चोरून लपून गुटखा विक्री करणाऱ्या पानटपरी चालकांचे धाबे दणाणले आहेत. दररोज तीन ते चार ठिकाणी छापे टाकून गुटखा जप्त होत आहे. दरम्यान, गुटखा खाऊन शासकिय कार्यालयाचे कोपरे रंगत असल्याचे चित्र दिसू लागले आहेत. त्यामुळे जिल्हाधिकारी राहुल गुप्ता, जिल्हा परिषदेचे मुख्यकार्यकारी अधिकारी विवेक गायकवाड, वैद्यकिय महाविद्यालयाचे अधिष्ठाता डॉ. चक्रधर मुंगल, जिल्हा शल्यचिकीत्सक डॉ. नितीन तडस, जिल्हा कार्यक्रम व्यवस्थापक शंकर तावडे यांच्या पुढाकारातून शासकिय कार्यालयातून तपासणी केली जात आहे. त्यानुसार जिल्हा सल्लागार डॉ. किरण लोंढे, कुलदीप केळकर, आनंद साळवे यांच्या पथकाने जिल्हा परिषद कार्यालयात तपासणी करण्यात आली. यावेळी पथकाने जिल्हा परिषद अंतर्गत विविध कार्यालयातून कर्मचाऱ्यांची तपासणी केली. यामध्ये १३ कर्मचारी गुटखा व तंबाखू खात असल्याचे आढळून आले आहे. तसेच त्यांच्याकडे गुटखा व तंबाखूच्या पुड्या देखील आढळून आल्या. त्यामुळे या कर्मचाऱ्यांवर दंडात्मक कारवाई करण्यात आली आहे. जिल्हयातील इतर शासकिय कार्यालयामधूनही लवकरच तपासणी मोहिम हाती घेतली जाणार असल्याचे जिल्हा प्रशासनाच्या सुत्रांनी सांगितले.
तंबाखू, गुटखा खाणाऱ्या कर्मचाऱ्यांची खैर नाही:कर्तव्यावर असताना तंबाखू, गुटखा सेवन करणाऱ्या १३ शासकीय कर्मचाऱ्यांवर दंडात्मक कारवाई
Ad Banner
Show Comments (0)
Hide Comments (0)
Subscribe
Login
0 Comments
Oldest
