बातमी ऐका (Marathi Voice Reader)
राष्ट्रवादी अजित पवार गटातर्फे एकाला राज्यसभेवर जाण्याची संधी आहे. या जागेवर अन्न व नागरी पुरवठा मंत्री छगन भुजबळ यांनी दावा केला आहे. तर दुसरीकडे माजी खासदार नवनीत राणा यांनी उपमुख्यमंत्री सुनेत्रा पवार यांची भेट घेतली आहे. यामुळे आता राज्यसभेसाठीच्या जागेवर राणांना संधी मिळणार अशी चर्चा सुरू झाली आहे. या संपूर्ण वादात शनिवारी भाजप नेत्या नवनीत राणा यांच्या नावाची चर्चा सुरू झाली होती. भाजप ही जागा नवनीत राणा यांच्यासाठी राष्ट्रवादीकडून मागेल, अशी शक्यता वर्तवली जात होती. त्यातच रविवारी सकाळी नवनीत राणा यांनी अचानक मुंबईत येऊन ‘देवगिरी’ बंगल्यावर थेट सुनेत्रा पवार यांची भेट घेतली. नवनीत राणा आणि सुनेत्रा पवार यांच्यात बंद दाराआड नेमकी काय चर्चा झाली, याचा तपशील अद्याप समोर आलेला नाही. भुजबळांच्या पुतण्यासाठी दोन अटी दरम्यान छगन भुजबळ यांनी खासदारकीसोबत दोन अटी पक्षाच्या राष्ट्रीय अध्यक्ष, उपमुख्यमंत्री सुनेत्रा पवारांपुढे घातल्या आहेत. त्यातील एक अट म्हणजे त्यांच्या रिक्त होणाऱ्या विधानसभेतील येवला मतदारसंघाची जेव्हा पोटनिवडणूक होईल तेव्हा त्यांचा पुतण्या समीर भुजबळ यालाच पक्षातर्फे उमेदवारी मिळाली पाहिजे. दुसरी अट म्हणजे निवडून आल्यावर समीर यांना महाराष्ट्रात कॅबिनेट मंत्रिपदही मिळालेच पाहिजे. राष्ट्रीय नेता बनण्याची भुजबळांची इच्छा सूत्रांनी सांगितले की, छगन भुजबळ यांची प्रतिमा महाराष्ट्रातील ओबीसींचे नेते अशी झाली आहे. राज्यसभेत जाऊन ही प्रतिमा त्यांना राष्ट्रीय पातळीवर नेण्याची तीव्र इच्छा आहे. मात्र, राज्यातील राजकारणात अप्रत्यक्ष सहभागही हवा आहे. दुसरीकडे महाराष्ट्रातील बदलती राजकीय, सामाजिक समीकरणे पाहता भुजबळ दिल्लीत गेलेले बरे, अशी भावना राष्ट्रवादीतील तरुण नेते व्यक्त करत आहेत. सूत्रांचे असेही म्हणणे आहे की, नवनीत राणांनी भाजपसोबतच राहणार अशी भूमिका घेतल्याने त्यांना संधी मिळणार नाही.
