बातमी ऐका (Marathi Voice Reader)
आगामी 2029 च्या लोकसभा आणि विधानसभा निवडणुकांसाठी शिवसेनेने आतापासूनच जोरदार तयारी सुरू केली आहे. निवडणुका अजून काही वर्षांवर असल्या तरी पक्षप्रमुख आणि उपमुख्यमंत्री एकनाथ शिंदे यांनी संघटनात्मक पातळीवर मोठी रणनीती आखण्यास सुरुवात केली आहे. राज्यभरात पक्षाची ताकद वाढवणे, अधिकाधिक लोकप्रतिनिधी निवडून आणणे आणि बूथ पातळीवर पक्ष मजबूत करणे या उद्देशाने शिवसेना आता मिशन मोडमध्ये काम करताना दिसत आहे. यासाठी राज्यातील 200 हून अधिक विधानसभा मतदारसंघांवर विशेष लक्ष केंद्रित करण्यात आले आहे. शिवसेनेच्या या नव्या मोहिमेत स्थानिक संघटनांना अधिक बळकट करण्यावर भर दिला जात आहे. पक्षाकडून ‘बुथ लेव्हल एजंट’ म्हणजेच BLA नोंदणी अभियान राबवले जाणार असून प्रत्येक मतदारसंघाचा स्वतंत्र आढावा घेतला जाणार आहे. निवडणुकीत विजय मिळवण्यासाठी बूथ पातळीवरील यंत्रणा मजबूत असणे अत्यंत महत्त्वाचे मानले जाते. त्यामुळे शिवसेनेचे वरिष्ठ नेते आता थेट गावागावात आणि मतदारसंघांमध्ये जाऊन कार्यकर्त्यांशी संवाद साधणार आहेत. पक्षाची ताकद वाढवण्यासाठी आणि स्थानिक अडचणी समजून घेण्यासाठी या दौऱ्यांना विशेष महत्त्व दिले जात आहे. या संपूर्ण महाअभियानाची मोठी जबाबदारी उपमुख्यमंत्री एकनाथ शिंदे यांनी उद्योगमंत्री उदय सामंत आणि खासदार डॉ. श्रीकांत शिंदे यांच्यावर सोपवली आहे. दोन्ही नेत्यांना प्रत्येकी 100 विधानसभा मतदारसंघांची जबाबदारी देण्यात आली आहे. हे नेते आपल्या-आपल्या मतदारसंघांमध्ये जाऊन स्थानिक पदाधिकारी, कार्यकर्ते आणि मतदारांशी थेट संपर्क साधणार आहेत. पक्षाची सध्याची स्थिती, स्थानिक पातळीवरील नाराजी, आगामी निवडणुकांची तयारी आणि संघटनात्मक अडचणी याचा सविस्तर आढावा घेतला जाणार आहे. या मोहिमेअंतर्गत खासदार डॉ. श्रीकांत शिंदे यांनी उत्तर महाराष्ट्र दौऱ्याला सुरुवात केली आहे. नाशिक जिल्ह्यातील चांदवड आणि निफाड विधानसभा मतदारसंघात त्यांनी ‘शिवसंवाद दौऱ्या’तून कार्यकर्त्यांशी संवाद साधला. जिल्हा परिषद आणि पंचायत समिती निवडणुकांच्या पार्श्वभूमीवर संघटनात्मक बांधणी समाधानकारक नसल्याबद्दल त्यांनी नाराजी व्यक्त केली. स्थानिक नेत्यांना पक्ष मजबूत करण्याच्या सक्त सूचना देत, केवळ शिफारशीवर उमेदवारी दिली जाणार नाही, तर प्रत्यक्ष कामगिरीच्या आधारेच निर्णय घेतला जाईल, असा स्पष्ट इशारा त्यांनी दिला. बैठकीत झालेली चर्चा आणि निरीक्षणे थेट एकनाथ शिंदे यांच्यापर्यंत पोहोचवली जाणार असल्याचेही त्यांनी स्पष्ट केले. पक्ष संघटना वाढवण्याच्या तयारीत दुसरीकडे उद्योगमंत्री उदय सामंत हे देखील मैदानात उतरले असून पुढील 3 दिवस ते मराठवाडा आणि पश्चिम महाराष्ट्रातील विविध मतदारसंघांचा झंझावाती दौरा करणार आहेत. स्थानिक कार्यकर्त्यांच्या बैठका, संघटनात्मक आढावा आणि आगामी निवडणुकांची तयारी यावर त्यांचा भर असणार आहे. त्यामुळे शिवसेनेची ही मोर्चेबांधणी आता राज्याच्या कानाकोपऱ्यात पोहोचताना दिसत आहे. आगामी काळात पक्ष अधिक आक्रमक पद्धतीने संघटना वाढवण्याच्या तयारीत असून 2029 च्या निवडणुकांसाठी आतापासूनच मजबूत पाया रचण्याचा प्रयत्न सुरू असल्याचे स्पष्ट संकेत या घडामोडींमधून मिळत आहेत.
