बातमी ऐका (Marathi Voice Reader)
वसमत तालुक्यातील एका गावात अल्पवयीन मुलीसोबत ओळख वाढवून तिच्यावर अत्याचार केल्याच्या आरोपावरून राजदरी (ता. वसमत) येथील एका तरुणावर कुरुंदा पोलिस ठाण्यास रविवारी ता. २९ गुन्हा दाखल झाला आहे. सदर मुलगी पाच महिन्याची गर्भवती झाल्यानंतर हा प्रकार उघडकीस आला असून पोलिसांनी आरोपी तरुणाच्या अटकेसाठी पथके रवाना केली आहेत. पोलिसांनी दिलेल्या माहितीनुसार, वसमत तालुक्यातील राजदरी येथील तरुण विजय कऱ्हाळे हा वसमत तालुक्यातील एका गावात त्यांच्या नातेवाईकांकडे आला होता. त्यावेळी त्या गावात काही दिवस राहिल्यानंतर त्याने एका अल्पवयीन मुलीशी ओळख वाढवून तिच्याशी बोलण्यास सुरवात केली. त्यानंतर त्याने मुलीशी प्रेमाच्या जाळ्यात ओढून शेतात जाऊन तिच्यावर अत्याचार केला. दरम्यान, विजय हा त्या मुलीस वारंवार भेटण्यासाठी येऊ लागला होता. यावेळी तो मुलीस प्रेमाचे नाटक करून तिच्यावर अत्याचार करू लागला. काही दिवसानंतर मुलीच्या पोटात दुखत होते शिवाय तिला अस्वस्थ वाटत असल्याने तिच्या कुटुंबियांनी तिला उपचारासाठी एका रुग्णालयात नेले. त्या ठिकाणी डॉक्टरांनी तपासणी केल्यानंतर सदर मुलगी गर्भवती असल्याचे डॉक्टरांनी सांगितले. सदर मुलगी पाच महिन्याची गर्भवती असल्याचे स्पष्ट झाल्यानंतर तिच्या कुटुंबियांनी तिच्याकडे विचारणा् केली असता तिने विजय याने प्रेमाचे नाटक करून अत्याचार केल्याचे सांगितले. या प्रकारानंतर तिच्या कुटुंबियांनी मुलीस घेऊन थेट कुरुंदा पोलिस ठाणे गाठून तक्रार दाखल केली. यावरून पोलिसांनी विजय कऱ्हाळे याच्या विरुध्द बाल लैंगिक अत्याचार प्रतिबंधक कायद्यांतर्गत गुन्हा दाखल केला आहे. सहाय्यक पोलिस निरीक्षक रामदास निरदोडे, उपनिरीक्षक गंधकवाड, कारामुंगे पुढील तपास करीत आहेत. पोलिसांनी आरोपीच्या अटकेसाठी पथके रवाना केली आहेत.
