बातमी ऐका (Marathi Voice Reader)
बीड जिल्ह्यातील पवित्र परळी वैजनाथ ज्योतिर्लिंग तीर्थक्षेत्राच्या विकासासाठी राज्य सरकारने मोठा निर्णय घेतला आहे. परळी वैजनाथ परिसराच्या सर्वांगीण विकासासाठी 301.54 कोटी रुपयांच्या विकास आराखड्याला मंजुरी देण्यात आली आहे. या निर्णयामुळे परळी परिसराचा मोठ्या प्रमाणात कायापालट होणार असल्याची चर्चा सुरू झाली आहे. राज्याच्या ग्रामविकास मंत्री पंकजा मुंडे यांनी स्वतः सोशल मीडियावर पोस्ट करत ही माहिती दिली असून त्यांनी मुख्यमंत्री देवेंद्र फडणवीस यांचे विशेष आभार मानले आहेत. पंकजा मुंडे सध्या चारधाम यात्रेसाठी गेलेल्या होत्या. केदारनाथ दर्शनादरम्यान त्यांना परळी वैजनाथ विकास आराखड्याला मंजुरी मिळाल्याची माहिती मिळाली. या निर्णयानंतर त्यांनी मुख्यमंत्री देवेंद्र फडणवीस यांची भेट घेत त्यांना केदारनाथाचे प्रसाद आणि पुष्पगुच्छ देऊन कृतज्ञता व्यक्त केली. परळी वैजनाथ हे राज्यातील महत्त्वाचे ज्योतिर्लिंग तीर्थक्षेत्र असल्याने या विकास आराखड्यामुळे भाविकांना मोठा दिलासा मिळणार असल्याचे त्यांनी म्हटले आहे. मंजूर करण्यात आलेल्या निधीतून परळी वैजनाथ परिसरात विविध पायाभूत सुविधा उभारल्या जाणार आहेत. भाविकांसाठी आधुनिक सोयी-सुविधा, रस्ते, स्वच्छता व्यवस्था, निवास सुविधा तसेच तीर्थक्षेत्र परिसराचे सुशोभीकरण करण्यात येणार असल्याची माहिती समोर आली आहे. राज्यभरातून तसेच देशाच्या विविध भागांतून मोठ्या संख्येने भाविक परळी वैजनाथ येथे दर्शनासाठी येत असतात. आगामी काळात नाशिकच्या कुंभमेळ्यामुळे देखील वाढत्या गर्दीच्या पार्श्वभूमीवर हा विकास आराखडा अत्यंत महत्त्वाचा मानला जात आहे. हा निधी विकासासाठी ऐतिहासिक ठरेल दरम्यान, या निर्णयामुळे परळी शहरासह संपूर्ण परिसराच्या पर्यटन आणि आर्थिक विकासालाही चालना मिळणार असल्याचे बोलले जात आहे. भाविकांना अधिक चांगल्या सुविधा उपलब्ध झाल्यास तीर्थक्षेत्राकडे येणाऱ्यांची संख्या वाढेल, असा विश्वास व्यक्त केला जात आहे. पंकजा मुंडे यांनी आपल्या पोस्टमध्ये हा निधी परळी वैजनाथच्या विकासासाठी ऐतिहासिक ठरेल, असे म्हटले आहे. राज्य सरकारच्या या निर्णयानंतर परळी परिसरात आनंदाचे वातावरण असून स्थानिकांकडूनही या निर्णयाचे स्वागत करण्यात येत आहे.
