बातमी ऐका (Marathi Voice Reader)
स्वातंत्र्यवीर विनायक दामोदर सावरकर यांच्या बदनामी प्रकरणात आवश्यक कागदपत्रे व माहिती सादर न केल्याने एका समाज माध्यम व सर्च इंजिन तसेच एका नामांकित वृत्तपत्राविरोधात अटक वॉरंट काढण्यात यावे, असा अर्ज सावरकर यांचे नातू सात्यकी सावरकर यांनी न्यायालयात केला आहे. काँग्रेस नेते राहुल गांधी यांनी मार्च 2023 मध्ये लंडनमधील अनिवासी भारतीयांसमोर भाषण करताना स्वातंत्र्यवीर सावरकर यांच्याविषयी बदनामीकारक विधान केले होते. या विधानामुळे सावरकर यांचे पणतू सात्यकी सावरकर यांनी राहुल गांधी यांच्याविरोधात मानहानीचा दावा दाखल केला आहे. पुणे येथील एमपीएमएलए विशेष न्यायालयात या दाव्याची सुनावणी सुरू आहे. या प्रकरणाची नियमित सुनावणी सुरू असून, राहुल गांधी यांचे वकील ॲड. मिलिंद पवार हे सात्यकी सावरकर यांचा उलटतपास घेत आहेत. सावरकर यांच्यावतीने ॲड. संग्राम कोल्हाटकर बाजू मांडत आहेत. या खटल्यात न्यायालयाने यापूर्वी दंड प्रक्रिया संहिता कलम 91 अंतर्गत संबंधित समाज माध्यम, सर्च इंजिन आणि वृत्तपत्राला आवश्यक ती कागदपत्रे व माहिती सादर करण्याचे आदेश दिले होते. त्यांचे वकील न्यायालयात हजर राहिले असले तरी, न्यायालयाच्या आदेशाचे पालन करण्यात आले नसल्याचे अर्जात म्हटले आहे. फिर्यादी पक्षाने यापूर्वीही संबंधितांविरोधात वॉरंट जारी करण्यासाठी अर्ज दाखल केला होता, जो अद्याप प्रलंबित आहे. आता या संदर्भात नव्याने अर्ज दाखल करण्यात आला आहे. या अर्जावर 1 जून रोजी आदेश दिला जाईल, तसेच याच दिवशी बचाव पक्षाकडून पुढील उलटतपासणी केली जाईल.
