संगमनेरातील नरभक्षक बिबट्याला ठार मारण्याचे वनमंत्र्यांचे आदेश:बिबट्याच्या हल्ल्यात मृत सिद्धेश कडलग कुटुंबाला 10 लाखांची मदत‎

संगमनेर तालुक्यातील नरभक्षक बिबट्याला मारण्याचे आदेश देण्यात आले. तसेच बिबट्याच्या हल्ल्यात बाधित कुटुंबीयांना मदत व भविष्यातील हल्ले रोखण्यासाठी प्रभावी उपाययोजना केल्या जातील, असे आश्वासन वनमंत्री गणेश नाईक यांनी माजी मंत्री बाळासाहेब थोरात यांना दूरध्वनीवरुन दिले. संगमनेर तालुक्यात बिबट्यांचे हल्ले सातत्याने वाढत आहे. नागरिकांमध्ये भीतीचे वातावरण आहे. या पार्श्वभूमीवर प्रभावी उपाययोजना करण्यासाठी माजी मंत्री थोरात यांनी वनमंत्री नाईक यांच्याशी दूरध्वनीवरून चर्चा केली. त्यावेळी त्यांनी हे आश्वासन दिले. दरम्यान, जवळे कडलग येथील बिबट्याच्या हल्ल्यात मयत झालेल्या सिद्धेश सुरज कडलग यांच्या कुटुंबीयांना वन विभागामार्फत १० लाखांची मदत देण्यात आली. १३ डिसेंबर रोजी जवळेकडलग येथे सिद्धेश याचा बिबट्याच्या हल्ल्यात मृत्यू झाला. संगमनेर तालुक्यात बिबट्यांची संख्या वाढत असून त्यांचा बंदोबस्त करावा, अशी मागणी सातत्याने होत आहे. याच पार्श्वभूमीवर आमदार सत्यजित तांबे व डॉ. जयश्री थोरात यांच्या पुढाकारातून संगमनेरमध्ये जनआक्रोश मोर्चा काढण्यात आला. केवळ सहानुभूती न दाखवता कडलग कुटुंबीयांना आर्थिक मदत द्यावी, अशी मागणी आमदार तांबे यांनी केली. त्यांनी वनमंत्री नाईक यांच्याशी दूरध्वनीवरून संपर्क साधत कुटुंबाला २५ लाखांची मदत मिळावी, अशी मागणी केली. यानुसार वनमंत्री नाईक यांनी १५ डिसेंबर २०२५ रोजीच्या पत्रानुसार उपवनसंरक्षक, अहिल्यानगर यांच्या कार्यालयामार्फत १० लाख रुपयांची मदत मंजूर करून वितरित केली. दरम्यान, आमदार अमोल खताळ यांच्या हस्ते उप वनसंरक्षक धर्मवीर सालविठ्ठल यांचे प्राप्त झालेले २५ लाख रुपये मदतीचे पत्र सिद्धेशचे वडील सुरज कडलग यांना देण्यात आले. दहा लाख रुपये रक्कम पाच वर्षासाठी व उर्वरित पाच लाख रुपये रक्कम दहा वर्षा करिता कडलग यांच्या राष्ट्रीयकृत बँकखात्यावर फिक्स डिपॉझिट करण्यात येणार असल्याचे लेखीपत्र कडलग यांना सुपूर्द केले. यावेळी संगमनेर उपविभागाचे सहाय्यक वनसंरक्षक अमरजीत पवार, सागर केदार, संतोष कडलग, सुनील देशमुख, सचिन कडलग, अमोल देशमुख, किरण वामन उपस्थित होते. बिबट्यांचे रेस्क्यू ऑपरेशन सुरूच ठेवा : आ. खताळ आमदार अमोल खताळ यांनी जवळे कडलग येथे बिबट्याच्या हल्ल्यात ठार झालेल्या सिद्धेश सुरज कडलग या सहा वर्षाच्या बालकाच्या घरी भेट देत कुटुंबीयांचे सांत्वन केले. वनविभागाच्या वतीने देण्यात येणाऱ्या २५ लाख रुपये मदतीचे पत्र आमदार अमोल खताळ यांच्या हस्ते सिद्धेशचे वडील सुरज कडलग यांच्याकडे सुपूर्द केले. जवळे कडलग आणि परिसरात बिबट्यांचा वाढता वावर लक्षात घेता नागरिकांच्या सुरक्षिततेसाठी तातडीने उपाययोजना करण्याबाबतचे निर्देश आ. खताळ यांनी वनविभाग अधिकाऱ्यांना दिले. या परिसरामध्ये जास्तीत जास्त पिंजरे लावावेत तसेच बिबट्यांचे रेस्क्यू ऑपरेशन सुरूच ठेवावे, अशा सूचना आ. खताळ यांनी वनविभागाच्या अधिकाऱ्यांना दिल्या.