CID ही कुचकामी यंत्रणा, बिनकामाचे ओझे:रोहित पवार यांचा आरोप; मुख्यमंत्र्यांना दादांच्या अपघाती मृत्यू प्रकरणात लक्ष घालण्याचे आवाहन

राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी सीआयडी सारखी यंत्रणा कुचकामी व बिनकामाचे ओझे असल्याचा आरोप करत मुख्यमंत्री देवेंद्र फडणवीस यांना अजित पवारांच्या अपघाती मृत्यू प्रकरणात लक्ष घालण्याचे आवाहन केले आहे. अजितदादांच्या अपघात प्रकरणात सीआयडी करत असलेला तपास बघता, ही तपास यंत्रणा काय करते नेमके हेच कळत नाही. CID सारख्या कुचकामी यंत्रणा म्हणजे बिनकामाचे ओझेच म्हणावे लागेल, असे ते म्हणालेत. अजित पवारांचा गत जानेवारी महिन्यात बारामती येथे झालेल्या एका विमान अपघातात मृत्यू झाला होता. तेव्हापासून रोहित पवार या प्रकरणाचा पारदर्शक तपास करण्याची मागणी करत आहेत. या प्रकरणी महाराष्ट्रात गुन्हा दाखल करण्यास अपयश आल्यानंतर त्यांनी थेट कर्नाटकात जाऊन झिरो एफआयआर दाखल केला. त्यानंतर तो महाराष्ट्रात वर्ग करण्यात आला. पण त्यावर अद्याप तरी कोणतीही कारवाई झाली नसल्याचा आरोप केला जात आहे. या पार्श्वभूमीवर रोहित पवार यांनी या प्रकरणाचा तपास करणाऱ्या सीआयडी चौकशीवर प्रश्नचिन्ह उपस्थित केले आहे. नेमके काय म्हणाले रोहित पवार? रोहित पवार म्हणाले, आदरणीय मुख्यमंत्री साहेब, अजितदादांच्या अपघाताला उद्या 4 महिने होतील. अधिवेशनात बोलताना तुम्ही गुन्हेगारांना पाताळातून शोधून काढण्याचा, CBI चौकशीबाबत अमित शहा साहेबांकडे पाठपुरावा करण्याचा तसंच कर्नाटकात नोंद झालेली झिरो FIR महाराष्ट्रात वर्ग करून घेण्याचा शब्द दिला होता. आपण शब्द देऊन अडीच महिने होत आले, या अडीच महिन्यात काय कार्यवाही झाली हे आपणच सांगावे. केंद्रीय गृहमंत्री अमित शहा साहेबांसोबत गेल्या अडीच महिन्यात आपल्या असंख्य बैठका झाल्या असतील त्यामध्ये सीबीआय चौकशीचा मुद्दा आपण घेतला नसेल तर आज होणाऱ्या बैठकीत तरी हा मुद्दा आग्रहाने घ्यायला हवा. राष्ट्रवादीचे मंत्री उपस्थित असतील तर त्यांनी देखील पाठपुरावा करायला हवा. मित्र हयात असला किंवा नसला तरी मित्रासाठी मैत्री नेहमीच जिवंत असते, ही सर्वसामान्य जनतेची भावना असते, राजकीय लोकांसाठी ही भावना वेगळी आहे का ? असा प्रश्न पडल्याशिवाय राहत नाही. राहिला प्रश्न CID चौकशीचा तर CID काय करते नेमकं हेच कळत नाही. गेल्या 28 तारखेला CID कार्यालयात गेलो असता तपास अधिकारीच उपस्थित नव्हते, त्यांना mail करून अनेक नवे पुरावे दिले, पत्र स्वतः जाऊन दिले तरी त्यांचा काहीही प्रतिसाद नाही. अजितदादांच्या अपघात प्रकरणात सीआयडी करत असलेला तपास बघता, CID सारख्या कुचकामी यंत्रणा म्हणजे बिनकामाचे ओझेच म्हणावे लागेल. असो, उद्या सीआयडी ऑफिसची वेळ मागितली असून उद्या सकाळी 10.30 वाजता भेट देणार आहे. CID ऑफिसला कदाचित सनदशीर मार्गाची भाषा समजत नसेल तर वेगळ्या भाषेत सांगावे लागेल, असे रोहित पवार म्हणाले.