बातमी ऐका (Marathi Voice Reader)
राष्ट्रवादी काँग्रेसचे प्रमुख आणि राज्यातील ज्येष्ठ नेते शरद पवार यांना मुंबईतील ब्रीच कँडी रुग्णालयात दाखल करण्यात आले आहे. या वृत्तामुळे राजकीय वर्तुळात चर्चांना उधाण आले असले तरी, प्राथमिक माहितीनुसार काळजी करण्यासारखी कोणतीही परिस्थिती नसल्याचे सांगण्यात येत आहे. नियमित वैद्यकीय तपासणीसाठीच शरद पवार रुग्णालयात दाखल झाल्याची माहिती सूत्रांकडून समोर आली आहे. डॉक्टरांच्या देखरेखीखाली त्यांच्या काही महत्त्वाच्या चाचण्या सध्या सुरू आहेत. वाढते वय, सततचा प्रवास आणि राजकीय तसेच सामाजिक कार्यक्रमांमधील व्यस्त दिनक्रम लक्षात घेता डॉक्टरांनी नियमित आरोग्य तपासणीचा सल्ला दिला होता. त्यानुसारच शरद पवार यांना ब्रीच कँडी रुग्णालयात दाखल करण्यात आले आहे. त्यांच्या प्रकृतीत कोणतीही गंभीर समस्या नसून केवळ रुटीन चेकअपचा भाग म्हणून विविध वैद्यकीय तपासण्या केल्या जात असल्याचे समजते. त्यामुळे कार्यकर्ते आणि समर्थकांनी कोणतीही चिंता करू नये, असेही सांगण्यात आले आहे. शरद पवार यांच्या प्रकृतीबाबत डॉक्टरांकडून सातत्याने लक्ष ठेवले जात असून तपासण्या पूर्ण झाल्यानंतर त्यांना लवकरच डिस्चार्ज दिला जाऊ शकतो, अशी माहिती मिळत आहे. राष्ट्रवादी काँग्रेसमधील अनेक नेते आणि कार्यकर्ते त्यांच्या प्रकृतीची माहिती घेत आहेत. राज्यभरातील समर्थकांकडूनही शरद पवार यांच्या प्रकृतीबाबत चौकशी केली जात आहे. मात्र, सध्या त्यांची प्रकृती स्थिर असल्याचे स्पष्ट करण्यात आले आहे. केवळ नियमित तपासणीसाठीच रुग्णालयात दाखल यापूर्वी एप्रिल महिन्यातही शरद पवार यांना उपचारांसाठी रुग्णालयात दाखल करण्यात आले होते. दिल्ली दौऱ्यावरून परतल्यानंतर त्यांची प्रकृती अचानक बिघडली होती. त्यावेळी काही दिवस डॉक्टरांच्या देखरेखीखाली त्यांच्यावर उपचार करण्यात आले होते. सुरुवातीला 2 दिवसांत डिस्चार्ज देण्याची शक्यता व्यक्त करण्यात आली होती, मात्र डॉक्टरांनी अधिक विश्रांतीचा सल्ला दिल्यामुळे त्यांना काही काळ रुग्णालयात ठेवण्यात आले होते. यावेळी मात्र केवळ नियमित तपासणीसाठीच ते रुग्णालयात दाखल झाल्याचे सांगितले जात आहे.
