बातमी ऐका (Marathi Voice Reader)
केंद्र सरकारने शेतकऱ्यांसाठी खत खरेदी प्रक्रिया सुलभ करण्यासाठी ‘फर्टीलायझर सेल ॲप्लिकेशन सिस्टीम’ (FSAS) नावाचे नवीन मोबाईल ॲप विकसित केले आहे. या ॲपमुळे शेतकऱ्यांना आता घरबसल्या खतांचे बुकिंग करता येणार आहे, ज्यामुळे त्यांची गैरसोय टळणार आहे. राष्ट्रीय खत विक्री आराखडा प्रकल्पांतर्गत, आयएफएमएस (IFMS) आणि ॲग्रीस्टॅक (AgriStack) या प्रणालींचे एकत्रीकरण करून हे ॲप तयार करण्यात आले आहे. खत विक्री प्रक्रियेत अधिक पारदर्शकता आणि सुलभता आणणे, तसेच शेतकऱ्यांचे हित साधणे हा यामागील मुख्य उद्देश आहे. या नवीन प्रणालीमुळे शेतकऱ्यांना खत खरेदीसाठी रांगेत उभे राहण्याची गरज भासणार नाही. तसेच, त्यांना आवश्यक असलेल्या खतांचे आगाऊ बुकिंग करता येणार असल्याने, दुकानदारांकडून इतर अनावश्यक खतांची सक्ती होण्याची शक्यता कमी होईल. यामुळे खत विक्री व्यवस्थेत अधिक पारदर्शकता येईल. सध्या, जिल्ह्यातील कृषी सेवा केंद्रांमध्ये खतसाठा उपलब्ध आहे की नाही, याची अचूक माहिती शेतकऱ्यांना मिळत नाही. यामुळे त्यांना प्रत्यक्ष दुकानांवर जाऊन त्रास सहन करावा लागतो. नव्या ॲपमुळे खत उपलब्धतेची माहिती वेळेवर मिळणार असल्याने शेतकऱ्यांचा वेळ आणि श्रम वाचणार आहे. या ॲपच्या माध्यमातून शेतकरी क्यूआर कोड (QR Code) द्वारे खतांचे ऑनलाईन बुकिंग करू शकतील. हा क्यूआर कोड आधारित बुकिंग तीन दिवसांसाठी वैध राहील. संबंधित शेतकरी त्यांच्या सोयीनुसार निवडलेल्या खत विक्रेत्याकडे जाऊन खत खरेदी करू शकतील, अशी माहिती कृषी विभागाने दिली आहे.
