प्रतिनिधी | यवतमाळ आजचा काळ हा दक्ष राहण्याचा काळ आहे. विज्ञान युगात प्रत्येकाने दक्ष राहायला हवे. आपल्या मुलांना शिक्षित तर कराच पण सोबत सुसंस्कारीतही करा. यामुळे चांगल्या संस्कारातून उत्तम समाज घडेल, असे प्रतिपादन पंकज महाराज पोहोकर यांनी केले. अधिक मासानिमित्ताने आयोजित शिवपुराण कथा सप्ताहात ते बोलत होेते. लोहारा येथील कमलेश्वर मंदिरात शिवपुराण कथा पर्वाचे आयोजन केले आहे.१८ ते २५ मे या कालावधीत शिवपुराण कथा पर्व होत आहे. सकाळी ९ ते ११ आणि सायंकाळी ६ ते ९ या कालावधीत शिवपुराण कथा सप्ताह आयोजित करण्यात आला आहे. दक्षराजाच्या यज्ञ प्रसंगातील देवी सतीची कथेचे त्यांनी वाचन केले. यावेळी भगवान शिव, देवी सती आणि दक्ष राजाची पौराणिक कथा वाचन करताना आजच्या काळातही अहंकार न करता प्रत्येकाने दक्ष कसे राहायला हवे. याबाबत ते बोलत होते. ते पुढे बोलताना म्हणाले, आपल्या दैवाचा विधाता आपणच आहे. आणि जीवनात मान मिळवायचा असेल तर अपमान अपमान सहन करता आला पाहिजे. तरच सर्वसंकटांवर मात करता येते. अलिकडच्या काळात वृद्धाश्रमाची संख्या वाढत आहे. मुलांवर जर चांगले संस्कार असतील तर चांगल्या विचाराची समाजात पेरणी होईल. वृद्धाश्रमाची आवश्यकताच पडणार नाही. असे ते म्हणाले. यावेळी दक्ष राजाच्या काळातील संपूर्ण प्रसंग नाटक रूपात भक्तांनी सादर केला. शिवपुराण कथेच्या श्रवणासाठी भाविकांनी गर्दी केली होती. सप्ताहाच्या यशस्वीतेसाठी मंदिराचे अध्यक्ष सदाशिव बेहरे, सचिव संजय चिद्दरवार, उपाध्यक्ष डॉ. आनंद भुसारी, दुर्गा यादव, अजय यादव, उमेश यादव, प्रकाश कनोई, बजरंगप्रसाद दुबे, बंडू कुंडलवार, संतोष डोईजड, सुरेश तिरसिंगे, संजय उपासने, राजू चोरे, सहदेव पाली, संजय भैर, भास्कर केळापुरे यांच्यासह भक्तांकडून परिश्रम घेतले जात आहेत.
