बातमी ऐका (Marathi Voice Reader)
देशापुढील संकटाची मालिका लक्षात घेता, येत्या काळात पेट्रोल-डिझेलचा मोठा तुटवडा भासणार आहे. या पार्श्वभूमीवर संत गाडगेबाबा अमरावती विद्यापीठाने शनिवारपासून ‘नो व्हेईकल डे’ पाळण्याचे ठरविले आहे. विद्यापीठ प्रशासनाच्या या निर्णयाचे सर्वत्र स्वागत केले जात आहे. पंतप्रधान नरेंद्र मोदी आणि महाराष्ट्राचे मुख्यमंत्री देवेंद्र फडणवीस यांनी केलेल्या आवाहनाला प्रतिसाद देत विद्यापीठ स्तरावर विविध उपाययोजना राबविण्यासंदर्भात एक बैठक पार पडली. कुलगुरू डॉ. मिलींद बारहाते यांच्या अध्यक्षतेखाली आयोजित या सहविचार सभेत हा निर्णय घेण्यात आला. यावेळी कुलगुरू डॉ. बारहाते म्हणाले, देशाच्या विकास कार्यात आपले योगदान देण्यासाठी, समाजासमोर एक आदर्श निर्माण करण्यासाठी विद्यापीठ काही महत्त्वपूर्ण निर्णय घेत आहे. ‘नो व्हेईकल डे’ हा याच श्रृंखलेचा एक भाग आहे. या दिवशी विद्यापीठ परिसरात कोणीही पेट्रोल किंवा डिझेलची वाहने आणणार नाही. केवळ सायकल व ई-बाईक आणू शकतील. विद्यापीठात बसनेही येता येईल. यामधून दिव्यांग कर्मचारी यांना वगळण्यात आले आहे. विद्यापीठ प्रशासन केवळ याच एका निर्णयावर थांबले नाही. कारपुलिंग व शेअरिंगच्या माध्यमातून पुढील सहा महिन्यांसाठी एकाच भागातून येणारे सर्व अधिकारी व कर्मचारी यांनी एकाच वाहनाचे शेअरिंग किंवा कारपुलिंग करण्याचा प्रयत्न करावा. असेही या सभेत ठरविण्यात आले. याबाबत विद्यापीठाच्या प्रशासन विभागाकडून तातडीने परिपत्रक काढून सर्व शैक्षणिक व प्रशासकीय विभागांना कळविण्यात आले आहे. सर्वांनी त्याचे काटेकोरपणे पालन करावे. अशा सूचना याप्रसंगी कुलसचिव डॉ. अविनाश असनारे यांनी दिल्या. बैठकीला प्र-कुलगुरू डॉ. महेंद्र ढोरे तसेच विद्यापीठातील सर्व संवैधानिक अधिकारी, शैक्षणिक व प्रशासकीय विभागप्रमुख आणि समन्वयक उपस्थित होते. विद्यापीठ प्रशासनाच्या या निर्णयाचे सर्वत्र स्वागत केले जात आहे. शनिवारचे अध्यापनही ऑनलाइन पद्धतीने विद्यापीठातील सर्व शैक्षणिक विभागांचे महिन्यातील सर्व शनिवारचे शैक्षणिक कामकाज ऑनलाइन पद्धतीने घेण्याचेही यावेळी ठरविण्यात आले. विविध प्राधिकरणांच्या बैठकीदेखील ऑनलाइन घेतल्या जाणार आहेत. विद्यापीठाच्या विविध विभागांतर्गत होणाऱ्या सर्व समित्या आणि उपसमित्यांच्या बैठका प्रत्यक्ष घेण्याऐवजी ऑनलाइन किंवा आभासी पद्धतीने घेण्याचा निर्णयही घेण्यात आला आहे.
