बातमी ऐका (Marathi Voice Reader)
पुण्यात सायबर चोरट्यांनी मुंबई पोलिसांच्या गुन्हे शाखेतील अधिकारी असल्याची बतावणी करून एका ८७ वर्षीय ज्येष्ठ डॉक्टरांची ४६ लाख रुपयांची ऑनलाइन फसवणूक केली आहे. या प्रकरणी शिवाजीनगर येथील सायबर पोलिस ठाण्यात गुन्हा दाखल करण्यात आला आहे. डेक्कन जिमखाना भागात राहणाऱ्या या डॉक्टरांना गेल्या महिन्यात २४ मे रोजी सायबर चोरट्यांनी मोबाइलवर संपर्क साधला. त्यांनी डॉक्टरांना मुंबई पोलिसांच्या गुन्हे शाखेतील अधिकारी असल्याचे सांगितले. तुमच्याविरुद्ध गुन्हा दाखल झाला असून, प्रकरण सर्वोच्च न्यायालयात पोहोचले आहे, अशी भीती त्यांना दाखवण्यात आली. अटक टाळण्यासाठी तातडीने पैसे जमा करावे लागतील, असे सांगून चोरट्यांनी डॉक्टरांना धमकावले. घाबरलेल्या डॉक्टरांनी चोरट्यांच्या वेगवेगळ्या बँक खात्यांमध्ये एकूण ४६ लाख रुपये जमा केले. फसवणूक झाल्याचे लक्षात आल्यानंतर डॉक्टरांनी पोलिसांत तक्रार दिली. पोलिस निरीक्षक संगीता देवकाते या प्रकरणाचा पुढील तपास करत आहेत. दरम्यान, एका वेगळ्या घटनेत, बँक अधिकारी असल्याची बतावणी करून सायबर चोरट्यांनी एका ज्येष्ठ नागरिकाची चार लाख दहा हजार रुपयांची फसवणूक केली आहे. या प्रकरणी बाणेर पोलिस ठाण्यात गुन्हा दाखल करण्यात आला आहे. बाणेर परिसरात राहणाऱ्या या ज्येष्ठ नागरिकाला चोरट्यांनी मोबाइलवर संपर्क साधला. बँकेतून बोलत असल्याचे सांगून त्यांनी बँक खाते अद्ययावत करण्याची आवश्यकता असल्याचे सांगितले. या बहाण्याने चोरट्यांनी त्यांच्या बँक खात्याची माहिती मिळवली. त्यानंतर चोरट्यांनी पीडित व्यक्तीला एक लिंक पाठवली. ती लिंक उघडताच, चोरट्यांनी त्यांच्या बँक खात्यातून चार लाख दहा हजार रुपयांची रक्कम दुसऱ्या खात्यात वर्ग केली. गुन्हे शाखेचे पोलिस निरीक्षक विजय खिलारे या प्रकरणाचा पुढील तपास करत आहेत.
