प्रेमप्रकरणातून एका 21 वर्षीय तरुणीने वारजे माळवाडी परिसरात गळफास घेऊन आत्महत्या केल्याची धक्कादायक घटना घडली आहे. या प्रकरणी तरुणीच्या आईने दिलेल्या फिर्यादीनुसार, तिच्या प्रियकरावर आत्महत्येस प्रवृत्त केल्याचा गुन्हा दाखल करण्यात आला आहे. पोलिसांनी दिलेल्या माहितीनुसार, राज ठोंबरे (वय 23, रा. कोथरूड) असे गुन्हा दाखल झालेल्या तरुणाचे नाव आहे. मयत तरुणी वारजे माळवाडी येथे राहत होती. आरोपी राज ठोंबरे आणि मयत तरुणीचे गेल्या दोन वर्षांपासून प्रेमसंबंध होते. आरोपी राजने दुसऱ्या एका तरुणीशी मैत्री केल्यानंतर मयत तरुणीला टाळण्यास सुरुवात केली होती. यावरून तरुणीने त्याला जाब विचारला असता, त्याने तिच्याशी भांडणे करून मानसिक त्रास दिला. या त्रासाला कंटाळून तरुणीने 4 मे रोजी राहत्या घरात गळफास घेऊन जीवन संपवले. सुरुवातीला या घटनेची अकस्मात मृत्यू अशी नोंद करण्यात आली होती. मात्र, तरुणीच्या आईने वारजे माळवाडी पोलीस ठाण्यात फिर्याद दिल्यानंतर पोलिसांनी राज ठोंबरेविरुद्ध गुन्हा दाखल केला आहे. या प्रकरणाचा पुढील तपास पोलीस उपनिरीक्षक भांबेरे करत आहेत. ऑनलाइन टास्कच्या आमिषाने महिलेची फसवणूक ऑनलाइन पद्धतीने काम केल्यास चांगला परतावा मिळेल, असे आमिष दाखवून सायबर चोरट्यांनी एका महिलेची चार लाख रुपयांची फसवणूक केली. या प्रकरणी चोरट्यांविरुद्ध लोहगाव पोलिसांनी गु्न्हा दाखल केला आहे. याबाबत एका 54 वर्षीय महिलेने फिर्याद दिली आहे. पोलिसांनी दिलेल्या माहितीनुसार, तक्रारदार महिला लोहगाव परिसरात राहायला आहेत. सायबर चोरट्यांनी त्यांच्या मोबाइल क्रमांकावर संदेश पाठविला. ऑनलाइन पद्धतीने घरातून काम करण्याची संधी (ऑनलाइन टास्क) असे आमिष दाखवून सायबर चोरट्यांनी महिलेला जाळ्यात ओढले. सुरुवातीला महिलेला एक काम दिले. त्यानंतर महिलेला या कामात पैसे गुंतविल्यास चांगले पैसे मिळतील, असे सांगितले. महिलेने चोरट्यांच्या खात्यात चार लाख चार हजार रुपये जमा केले. पैसे जमा केल्यानंतर महिलेल परतावा दिला नाही. पोलीस निरीक्षक कदम तपास करत आहेत. दरम्यान, क्रेडीट कार्डचे कुपन देण्याचे आमिष दाखवून खराडी भागातील एका तरुणीची सायबर चोरट्यांनी तीन लाख 47 हजार रुपयांची फसवणूक केली. या प्रकरणी सायबर चोरट्यांविरुद्ध खराडी पोलिसांनी गुन्हा दाखल केला असून, गुन्हे शाखेचे पोलीस निरीक्षक एस पालेकर तपास करत आहेत.
