बातमी ऐका (Marathi Voice Reader)
हिंगोली तालुक्यातील नरसी नामदेव पोलिस ठाण्याच्या हद्दीतील पुसेगाव येथे जमिनीच्या मालकी हक्काच्या वादातून दोन गटात हाणामारी झाल्याची घटना घडली आहे. या प्रकरणी दोन्ही गटांनी परस्पर दिलेल्या तक्रारीवरून नरसी नामदेव पोलिसांनी गुरुवारी ता 4 दोन्ही गटांतील एकूण 12 जणांवर गुन्हे दाखल केले आहेत. यामध्ये पुसेगांव येथील मनोहर नांदेडकर यांनी नर्सी नामदेव पोलिस ठाण्यात दिलेल्या तक्रारीनुसार, ता 3 जून रोजी सायंकाळी पाच वाजण्याच्या सुमारास मालमत्ता क्रमांक 1192 मधील जागेच्या कारणावरून आठ जणांनी बेकायदेशीर मंडळी जमवून त्यांना व साक्षीदारांना मारहाण केली. या प्रकरणी शेख अखिल, शेख कामिल, शेख अतीक, शेख फिरोज, शेख अजिम, शेख मजीद, शेख शौकत, शेख बाबू (सर्व रा. पुसेगाव) आणि रितेश तिवारी (रा. नरसी) यांच्या विरोधात गुन्हा दाखल करण्यात आला आहे. आरोपींनी फिर्यादीला शिवीगाळ करून लाथाबुक्क्यांनी मारहाण केली आणि जीवे मारण्याची धमकी दिली असल्याचे तक्रारीत म्हटले आहे. तर दुसऱ्या बाजूने मोहम्मद एहसानउल्लाह देशमुख यांनी फिर्याद दिली आहे. 3 जून रोजी दुपारी चार वाजेच्या सुमारास देशमुख हे त्यांच्या आईच्या मालकीची जमीन (गट क्र. 01, पुसेगाव) पाहण्यासाठी गेले होते त्यावेळी ‘आम्ही विकत घेतलेल्या जमिनीची पाहणी का करता?’ असे म्हणून शिवराज नांदेडकर, सूरज नांदेडकर, ओंकार नांदेडकर आणि स्वतः मनोहर नांदेडकर यांनी त्यांना अश्लील भाषेत शिवीगाळ करत मारहाण केली व जीवे मारण्याची धमकी दिली. या तक्रारीवरून चार जणांविरुद्ध गुन्हा दाखल झाला आहे. या घटनेचे गांभीर्य ओळखून उपविभागीय पोलिस अधिकारी राजकुमार केंद्रे, सपोनि अशोक घारगे यांनी घटनास्थळी भेट देऊन पाहणी केली आहे . या दोन्ही गुन्ह्यांचा पुढील तपास सपोनि घारगे करत असून, सध्या तरी कोणत्याही आरोपीला अटक करण्यात आलेली नाही. आरोपींच्या अटकेसाठी पोलिसांनी दोन पथके स्थापन केली असल्याचे पोलिसांनी सांगितले.
