बातमी ऐका (Marathi Voice Reader)
हिंगोली जिल्ह्यात आता बेकायदेशीर दारु लपविण्यासाठी दारु विक्रेते मिळेल ती जागा शोधू लागले असून सारंगवाडी येथे स्वच्छतागृहात दारु का ठेऊ दिली नाही या कारणावरून एका कुटुंबाला काठीने मारहाण झाल्याची घटना या प्रकरणी चौघांवर सोमवारी ता. 8 रात्री उशिरा औंढा नागनाथ पोलिस ठाण्यात गुन्हा दाखल झाला आहे. हिंगोली जिल्ह्याचे पोलीस अधीक्षक निलाभ रोहन, अप्पर पोलीस अधीक्षक कमलेश मीना आणि स्थानिक गुन्हे शाखेचे निरीक्षक मोहन भोसले यांनी जिल्ह्यात अवैध व्यवसायांविरुद्ध विशेष मोहीम उघडली आहे. बेकायदेशीर दारू विक्री, गुटखा आणि जुगार अड्ड्यांवर पोलिसांच्या पथकांकडून सातत्याने छापे टाकले जात आहेत. पोलिसांच्या या कडक कारवाईमुळे अवैध दारू विक्रेत्यांचे धाबे दणाणले असून, ते आता ग्रामीण भागात मिळेल त्या ठिकाणी दारू लपवण्याचा प्रयत्न करत आहेत. औेढा नागनाथ तालुक्यातील सारंगवाडी येथे दारु विक्रेत्याने कारवाईच्या भिती पोटी गावातील सुभाष ठोंबरे यांच्या घराशेजारील स्वच्छतागृहात चौघाजणांनी बेकायदेशीर दारूचे बॉक्स ठेवण्याचा प्रयत्न केला. मात्र यावेळी सुभाष यांनी त्यास विरोध केला. या ठिकाणी दारुचे बॉक्स ठेऊ नका असे त्यांनी सांगितले. याचा राग मनात धरून संदीप ठोंबरे, महादू ठोंबरे, भगवान ठोंबरे आणि वैभव ठोंबरे यांनी संगनमत करून सुभाष ठोंबरे यांना शिवीगाळ करत काठीने मारून जखमी केले. सदर भांडण सोडविण्यासाठी सुभाष यांचे वडील, आई व भाऊ मध्ये पडले असता, त्यांच्या डोक्यावर काठीने मारहाण करून गंभीर जखमी करण्यात आले. तसेच जिवे मारण्याची धमकी देण्यात आली. या प्रकरण सुभाष यांनी दिलेल्या तक्रारीवरून औंढा नागनाथ पोलिस ठाण्यात चौघांवर गुन्हा दाखल झाला आहे. पोलीस उपनिरीक्षक राठोड, जमादार दिलीप नाईक पुढील तपास करीत आहेत.
