परीक्षेतील गैरप्रकार खपवून घेतला जाणार नाही:कठोर कारवाईची मागणी, जिल्हाधिकाऱ्यांना दिले निवेदन; विद्यार्थ्यांचे भवितव्य धोक्यात‎

नीट पेपरफुटीचे पडसाद उमटणे सुरुच असून, परीक्षेतील गैरप्रकार खपवून घेतला जाणार नाही, असा इशारा फुले-शाहू-आंबेडकर शिक्षक संघटना (पॅक्टो) व अशोक प्रतिष्ठानने दिला आहे. नीट पेपरफुटी प्रकरणी कठोर कारवाई करण्याची मागणीही करण्यात आली आहे. याबाबत जिल्हाधिकाऱ्यांना निवेदन सादर करण्यात आले. नीट पेपरफुटीची व्याप्ती दिवसेंदिवस वाढतच आहे. या प्रकरणात आधी रसायनशास्त्राचे प्राध्यापक पी.व्ही. कुलकर्णी आणि नंतर वनस्पतिशास्त्र लेक्चरर मनीषा मांढरे यांना अटक करण्यात आली. त्यानंतर नॅशनल टेस्टिंग एजन्सी च्या अधिकाऱ्याचाही सहभाग असल्याचे समोर आले. लातूरचे प्राध्यापक शिवराज मोटेगावकरला सीबीआयने अटक केली होती. विविध संघटना, राजकीय पक्षांनी मोटेगावकरच्या अकोल्यातील कार्यालया बाहेर आंदोलनही केले होते. दरम्यान आता याचअनुषंगाने पॅक्टो व अशोक प्रतिष्ठानने जिल्हाधिकाऱ्यांना निवेदन सादर केले. नीटमधील प कथित प्रश्नपत्रिका फुटीच्या प्रकरणामुळे देशभरातील लाखो विद्यार्थ्यांचे भवितव्य धोक्यात आले असून परीक्षा व्यवस्थेवरील विश्वासाला मोठा धक्का बसला आहे. या गंभीर प्रकरणाची सखोल चौकशी करून दोषींवर कठोर कारवाई करण्यात यावी, अशी मागणी संघटनेने केली. विद्यार्थ्यांची मेहनत, पालकांचा आर्थिक त्याग आणि मानसिक संघर्ष यावर प्रश्नपत्रिका फुटीसारख्या घटनांमुळे पाणी फिरत आहे. त्यामुळे परीक्षा व्यवस्थेतील पारदर्शकता व विश्वासार्हता टिकवून ठेवण्यासाठी शासनाने तातडीने प्रभावी उपाययोजना करणे आवश्यक आहे, असेही संघटनेचे म्हणणे आहे. निवेदन देताना प्रा. डॉ. विजय आठवले, प्रा. डॉ. बाळकृष्ण खंडारे, प्रा. सुनील कांबळे, प्रा. शैलेश इंगळे, विद्याधर मोहोड, संदेश गवई, महेंद्र मोहोड, अनिल गवई, प्रा. विवेक पांडे, प्रा. सज्जन जाधव यांच्यासह अन्य मान्यवर उपस्थित होते. नीट पेपरफुटी प्रकरणाची स्वतंत्रपणे उच्चस्तरीय चौकशी करुन दोषींवर कठोर कायदेशीर कारवाईची मागणी फुले-शाहू-आंबेडकर शिक्षक संघटना (पॅक्टो) व अशोक प्रतिष्ठानकडून करण्यात आली आहे. पेपर फुटिमुळे प्रभावित विद्यार्थ्यांना न्याय मिळवून देण्याची मागणी संगटनेने केली आहे. शिक्षण क्षेत्रातील वाढते व्यापारीकरण, परीक्षा व्यवस्थेतील अनियमितता आणि भ्रष्टाचाराविरोधात संघर्ष सुरूच राहील, असा इशाराही संघटनांच्या वतीने देण्यात आला. विद्यार्थ्यांच्या भविष्याशी कोणतीही तडजोड सहन केली जाणार नाही, अशी ठाम भूमिका संघटनेने घेतली आहे.