नेवासे-देवगड मार्गावरील जंगल परिसरात मोठ्या प्रमाणावर वैद्यकीय कचरा टाकण्यात आल्याचा धक्कादायक प्रकार समोर आला आहे. वापरलेल्या सिरिंज, इंजेक्शनच्या सुया, औषधांच्या रिकाम्या व फुटलेल्या बाटल्या तसेच वैद्यकीय उपचारांमध्ये वापरण्यात येणारे साहित्य यांचा अक्षरशः खच रस्त्यालगत वनविभागात आढळून आला आहे. रुग्णालये व दवाखान्यांमधून निर्माण होणारा वैद्यकीय जैविक कचरा हा अत्यंत धोकादायक मानला जातो. त्याची विल्हेवाट लावण्यासाठी शासनाने स्पष्ट नियमावली तयार केलेली असताना हा कचरा जंगलात फेकण्याचे धाडस नेमके कोणी व का केले असा प्रश्न उपस्थित केला जात आहे. जिल्ह्यात जैविक कचरा संकलनासाठी अधिकृत यंत्रणा कार्यरत असून नियुक्त एजन्सीमार्फत रुग्णालये व दवाखान्यांतून नियमित कचरा गोळा केला जातो. त्यासाठी संबंधित संस्थांकडून शुल्कही आकारले जाते. संबंधित शुल्क वाचवण्यासाठीच हा कचरा अधिकृत यंत्रणेकडे न देता जंगलात टाकण्यात आला असेल तर तो केवळ नियमभंग नसून सार्वजनिक आरोग्याशी खेळ करणारा गंभीर प्रकार मानला जात आहे. अन्न व औषध प्रशासनाचे आयुक्त तुकाराम मुंडे यांच्या कार्यकाळात भेसळयुक्त अन्नपदार्थांविरोधात कारवाया सुरू आहेत. त्याचप्रमाणे जैविक कचऱ्याच्या बेकायदेशीर विल्हेवाटीच्या घटनांवरही कठोर कारवाई होण्याची अपेक्षा व्यक्त होत आहे. या प्रकरणाची सखोल चौकशी करून संबंधित कचरा कोणत्या रुग्णालयातून अथवा दवाखान्यातून आला याचा शोध घ्यावा व दोषींवर कारवाई करावी, अशी मागणी पर्यावरणप्रेमी व नागरिकांकडून होत आहे. दरम्यान, तालुका आरोग्य अधिकारी भागवत दहिफळे, ग्रामीण रुग्णालयाचे डॉ. मोहसीन बागवान, आरोग्य विस्तार अधिकारी गोविंद व्यवहारे व नगरपंचायतीचे सुधीर चित्ते यांनी घटनास्थळी भेट देऊन पाहणी केली. यावेळी पंचनामा करण्यात आला. दरम्यान, सदरच्या मेडिकल कचऱ्यामध्ये सापडलेल्या कागदांवरून सदरचा मेडिकल कचरा शहरातील एका वैद्यकीय व्यवसायिकाचा असल्याचे निष्पन्न झाल्याने याबाबत नेवासा नगरपंचायत आणि कारवाईसाठी जिल्हा वैद्यकीय अधिकाऱ्यांना पत्र देण्यात आले असल्याचे तालुका वैद्यकीय अधिकारी यांनी सांगितले
