बातमी ऐका (Marathi Voice Reader)
वंचित बहुजन आघाडीचे प्रमुख प्रकाश आंबेडकर यांनी भाजप आणि कॉंग्रेसवर गंभीर आरोप करत टीका केली आहे. भाजप आणि कॉंग्रेस एकच असल्याचे त्यांनी म्हटले आहे. याविषयी बोलताना त्यांनी नांदेड मतदारसंघातील उदाहरण देखील दिले आहे. तसेच कॉंग्रेस भाजपची ए टु झेड टीम असल्याचेही त्यांनी म्हटले आहे. प्रकाश आंबेडकर ट्विट करत म्हणाले, भाजप = काँग्रेस याचे हे एक उत्तम उदाहरण आहे. नांदेड महानगरपालिका निवडणुकीतील काँग्रेसचे उमेदवार रामदास पाटील सुमठणकर होते. हे रामदास पाटील सुमठणकर कोण आहेत? हे तेच रामदास पाटील सुमठणकर आहेत, ज्यांनी 2024 च्या लोकसभा निवडणुकीत भाजपचे हिंगोली लोकसभा प्रभारी म्हणून काम पाहिले होते. त्यांनी अपक्ष उमेदवारी अर्जही दाखल केला होता, परंतु भाजपचे गिरीश महाजन आणि देवेंद्र फडणवीस यांच्याशी चर्चा केल्यानंतर तो मागे घेतला. पुढे प्रकाश आंबेडकर म्हणाले, याचा अर्थ असा की, नांदेड काँग्रेसची पहिली पसंती भाजपशी घनिष्ठ संबंध असलेल्या व्यक्तीला होती. वंचित बहुजन आघाडीच्या नांदेड टीमने काँग्रेसला वंचित बहुजन आघाडीचे उमेदवार प्रशांत इंगोले यांना पाठिंबा देण्याची विनंती केली होती. काँग्रेसने नकार दिला. त्याऐवजी, काँग्रेसने शिवसेना (यूबीटी) चे उमेदवार कृष्ण पाटील यांना पाठिंबा देण्याचा निर्णय घेतला. हे कृष्ण पाटील कोण आहेत? तो हिंगोलीचे खासदार नागेश पाटील अष्टिकर यांचा मुलगा आहे, जे भाजपचा मित्रपक्ष असलेल्या शिवसेना (शिंदे) मध्ये सामील होण्याच्या तयारीत आहेत. अष्टिकर हे तेच उमेदवार आहेत, ज्यांच्या विरोधात भाजपने रामदास पाटील सुमठंकर यांना उमेदवारी मागे घेण्यास सांगितले होते, ज्यानंतर नागेश पाटील विजयी झाले, अशी माहिती प्रकाश आंबेडकर यांनी दिली आहे. या घटनांचा संबंध, काँग्रेसचा पहिला उमेदवार भाजपशी संलग्न उमेदवार होता. काँग्रेसची दुसरी पसंती अशा नेत्याचा मुलगा आहे, जो भाजप आघाडीकडे झुकत आहे आणि ज्याला भाजपने लोकसभा निवडणुकीत विजयी होण्यास मदत केली होती, अशी टीका प्रकाश आंबेडकर यांनी केली आहे. काँग्रेसला भाजपला हरवण्यापेक्षा सौदा करण्यात रस जेव्हा काँग्रेससमोर वंचित बहुजन आघाडीला (एक स्वतंत्र, आंबेडकरवादी, भाजपविरोधी शक्ती) पाठिंबा देणे आणि भाजपशी संलग्न उमेदवाराला पाठिंबा देणे, या दोन पर्यायांपैकी एकाची निवड करण्याचा प्रश्न आला, तेव्हा त्यांनी दुसऱ्या पर्यायाची निवड केली. का? कारण नांदेडमधील काँग्रेस नेतृत्वाला भाजपला हरवण्यात नव्हे, तर मतांसाठी सौदा करण्यात रस असल्याचे दिसते. ते भाजपचा विजय मान्य करतात, पण वंचित बहुजन आघाडीच्या उमेदवाराला स्वीकारत नाहीत, असेही प्रकाश आंबेडकर यांनी म्हटले. काँग्रेस ही भाजपची ‘ए टू झेड’ टीम तसेच नांदेड काँग्रेसचे नेतृत्व भाजप नेते देवेंद्र फडणवीस आणि अशोक चव्हाण करतात. जर काँग्रेसच्या 92 नगरसेवकांनी वंचित बहुजन आघाडीचे प्रशांत इंगोले यांच्याऐवजी कृष्णा पाटील यांना मत दिले, तर संपूर्ण देशाला विश्वास बसेल की काँग्रेस ही भाजपची ‘ए टू झेड’ टीम आहे आणि भाजपशी लढण्याची त्यांची चर्चा म्हणजे निव्वळ राजकीय देखावा, मूर्खपणा आणि पोकळ वक्तृत्व आहे, अशी टीका प्रकाश आंबेडकर यांनी केली आहे.
