बातमी ऐका (Marathi Voice Reader)
सेनगाव तालुक्यातील हात्ता येथे भांडणाची शूटिंग काढण्याच्या कारणावरून झालेल्या हाणामारी मध्ये पाच जण जखमी झाली असून या प्रकरणी परस्पर तक्रारीवरून आठ जणांविरुद्ध सेनगाव पोलिसठाण्यात बुधवारी ता 24 रात्री उशीरा गुन्हा दाखल झाला आहे पोलिसांनी दिलेल्या माहितीनुसार हात्ता येथील अनिल कांबळे व मोहन कांबळे यांच्यात बुधवारी तारीख 24 रात्रीच्या सुमारास वाद सुरू झाला. आमच्या भांडणाची व्हिडिओ शूटिंग का काढली या कारणावरून सुरू झालेला वाद शाब्दिक चकमकीनंतर हाणामारी पर्यंत पोहोचला. यामध्ये लोखंडी रॉड, चाकू, लाकडाने मारहाण झाली. या मारहाणी मध्ये पाच जखमी झाले. या प्रकरणात कुंडलिक कांबळे यांनी रात्री उशिरा सेनगाव पोलिसठाण्यात तक्रार दाखल केली. यामध्ये त्यांना गावातील अनिल कांबळे व लिंबाजी कांबळे यांनी चाकूने मारहाण करून जखमी केले तसेच त्यांचे आई-वडील सोडविण्यासाठी आले असता त्यांनाही मारहाण करून जखमी केली तसेच जीवे मारण्याची धमकी दिली. यावरून सेनगाव पोलिसांनी अनिल व लिंबाजी यांच्याविरुद्ध गुन्हा दाखल केला आहे. याच प्रकरणात अनिल कांबळे यांनी तक्रार दिली की त्यांना आमच्या भांडणाची व्हिडिओ शूटिंग का काढली या कारणावरून मोहन कांबळे, विशाल कांबळे, आकाश कांबळे, रवी कांबळे, करण कांबळे, कुंडलिक कांबळे यांनी मारहाण केली. सदर भांडण सोडविण्यासाठी त्यांचे वडील मध्ये पडले असता त्यांनाही मारहाण करून जखमी करण्यात आले. तसेच जीवे मारण्याची धमकी दिली यावरून पोलिसांनी वरील सहा जणांविरुद्ध गुन्हा दाखल केला आहे. सहाय्यक पोलिसनिरीक्षक संग्राम जाधव, जमादार पवन चाटसे, एकनाथ राठोड, सुभाष चव्हाण पुढील तपास करत आहेत. या मारहाण प्रकरणात पाच जखमींना उपचारासाठी रुग्णालयात पाठविण्यात आल्याचे पोलिसांच्या सूत्रांनी सांगितले.
