सिगारेट न दिल्याने वृद्धाचा खून:अमरावतीत एकाला अटक, दोन आरोपी फरार

सिगारेट न दिल्याच्या क्षुल्लक कारणावरून एका ६५ वर्षीय वृद्धाची धारदार शस्त्राने हत्या करण्यात आली. ही घटना बुधवार, २४ जून रोजी सकाळी राजापेठ पोलीस ठाण्याच्या हद्दीतील एमआयडीसी-गोपालनगर मार्गावरील सूतगिरणीजवळ उघडकीस आली. या प्रकरणी पोलिसांनी काही तासांतच एका आरोपीला अटक केली असून, दोन आरोपी अद्याप फरार आहेत. मृत व्यक्तीचे नाव माणिकराव बळीरामजी बोरकर (६५, रा. गोदावरी कॉलनी, अमरावती) असे आहे. माणिकराव यांना दारूचे व्यसन होते आणि ते अनेकदा दोन-दोन दिवस घराबाहेर राहत असत. २२ जून रोजी सकाळी ते त्यांच्या कुटुंबातील एका लहान मुलाच्या गुल्लक मधील अंदाजे तीन ते चार हजार रुपये घेऊन घराबाहेर पडले होते. नेहमीप्रमाणे ते परत येतील असे वाटल्याने कुटुंबीयांनी सुरुवातीला त्यांची हरविल्याची तक्रार दाखल केली नव्हती. बुधवारी सकाळी सूतगिरणीजवळील फूटपाथवर माणिकराव यांचा मृतदेह आढळून आला. माहिती मिळताच राजापेठ पोलिसांनी घटनास्थळी धाव घेऊन पंचनामा केला. पोलीस आयुक्त राकेश ओला यांच्यासह गुन्हे शाखेच्या पथकानेही घटनास्थळाला भेट दिली. मृतदेहावर धारदार शस्त्राचे वार आणि रक्ताने माखलेले कपडे असल्याने त्यांची हत्या झाल्याचे स्पष्ट झाले. या प्रकरणी मृत माणिकराव यांचा मुलगा जितेंद्र (३२) यांच्या तक्रारीवरून राजापेठ पोलिसांनी खुनाचा गुन्हा दाखल करून तपास सुरू केला. तपासादरम्यान, उद्देश उर्फ चिकू संजय खरड (२७, रा. मायानगर, अमरावती) याला अटक करण्यात आली. पोलिसांच्या तपासात समोर आले की, मंगळवारी रात्री माणिकराव हे सूतगिरणीजवळ दारू पित बसले होते. त्यावेळी उद्देश हा त्याच्या दोन सहकाऱ्यांसह त्यांच्या बाजूला दारू पित होता. उद्देशच्या एका सहकाऱ्याने माणिकराव यांच्याकडे सिगारेट मागितली. माणिकराव यांनी सिगारेट देण्यास नकार दिल्याने उद्देश आणि त्याच्या सहकाऱ्यांनी त्यांच्याशी वाद घातला. या वादातून तिघांनीही माणिकराव यांच्यावर धारदार शस्त्राने हल्ला करून त्यांची हत्या केली.