बातमी ऐका (Marathi Voice Reader)
सांगली-सातारा स्थानिक स्वराज्य संस्था मतदारसंघातील विधान परिषद निवडणुकीचे चित्र अखेर स्पष्ट झाले असून या मतदारसंघात तिरंगी लढत रंगणार आहे. अर्ज माघारी घेण्याची मुदत संपल्यानंतर तीन उमेदवार निवडणुकीच्या रिंगणात कायम राहिले आहेत. भारतीय जनता पक्षाचे धैर्यशील कदम, राष्ट्रवादी काँग्रेस शरदचंद्र पवार पक्षाचे अभयसिंह जगताप आणि अपक्ष उमेदवार किशोर धुमाळ यांच्यात थेट सामना होणार आहे. त्यामुळे या मतदारसंघातील निवडणूक राज्यातील सर्वाधिक चर्चेच्या लढतींपैकी एक ठरणार आहे. अर्ज माघारीच्या अखेरच्या दिवशी अनेक महत्त्वाच्या घडामोडी घडल्या. शिवसेनेशी संबंधित अपक्ष उमेदवार तानाजी पाटील यांनी आपला उमेदवारी अर्ज मागे घेतला. त्यानंतर काँग्रेसचे नगरसेवक संजय मेंढे आणि मयूर पाटील यांनीही माघार घेतली. तसेच अपक्ष उमेदवार बाळासाहेब पाटील यांनीदेखील निवडणुकीतून बाहेर पडण्याचा निर्णय घेतला. या सर्व माघारींनंतर निवडणुकीतील चित्र अधिक स्पष्ट झाले आणि अखेर तीनच उमेदवार मैदानात उरले. तानाजी पाटील यांच्या माघारीमागे महायुतीतील समन्वयाचे राजकारण असल्याचे स्पष्ट झाले आहे. मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्याशी चर्चा झाल्यानंतर महायुतीचा धर्म जपण्यासाठी हा निर्णय घेण्यात आल्याची माहिती मंत्री शंभूराज देसाई यांनी दिली. तानाजी पाटील यांना भविष्यात योग्य राजकीय सन्मान दिला जाईल, असे आश्वासनही त्यांना देण्यात आल्याचे सांगण्यात आले. स्वतः तानाजी पाटील यांनीदेखील आपल्या उमेदवारीमुळे महायुतीत कोणताही तणाव निर्माण होऊ नये, म्हणून वरिष्ठ नेत्यांच्या सूचनेनुसार अर्ज मागे घेतल्याचे स्पष्ट केले. निवडणुकीच्या अंतिम यादीत भारतीय जनता पक्षाचे धैर्यशील ज्ञानदेव कदम, राष्ट्रवादी काँग्रेस शरदचंद्र पवार पक्षाचे अभयसिंह जगताप आणि अपक्ष उमेदवार किशोर धुमाळ यांचा समावेश आहे. धैर्यशील कदम हे महायुतीचे अधिकृत उमेदवार म्हणून मैदानात आहेत, तर अभयसिंह जगताप यांना महाविकास आघाडीचा पाठिंबा आहे. दुसरीकडे किशोर धुमाळ यांनी अपक्ष म्हणून निवडणूक लढवण्याचा निर्धार कायम ठेवला आहे. त्यामुळे मतांचे विभाजन आणि स्थानिक पातळीवरील समीकरणे या निवडणुकीत निर्णायक ठरण्याची शक्यता आहे. सांगली-सातारा मतदारसंघात चुरशीची लढत या मतदारसंघाच्या मागील निवडणुकीत काँग्रेसचे मोहनराव कदम विजयी झाले होते. त्यामुळे यावेळीही या जागेकडे सर्वांचे लक्ष लागले आहे. महायुती आणि महाविकास आघाडी यांच्यातील थेट संघर्षासोबतच अपक्ष उमेदवाराचा प्रभाव किती पडतो, हेही महत्त्वाचे ठरणार आहे. अर्ज माघारीनंतर अनेक मतदारसंघांतील निवडणुका बिनविरोध झाल्या असल्या, तरी सांगली-सातारा मतदारसंघात मात्र चुरशीची लढत निश्चित झाली आहे. आता 18 जून रोजी होणाऱ्या मतदानानंतर या प्रतिष्ठेच्या लढतीत कोण बाजी मारणार, याकडे संपूर्ण राज्याचे लक्ष लागले आहे.
