सुरेश पाचभाई, मारेगाव
मारेगाव नगरी आज अक्षरशः राममय झाली असून प्रभू श्रीरामचंद्रांच्या जन्मोत्सवानिमित्त आयोजित भव्य शोभायात्रेची जय्यत तयारी पूर्ण झाली आहे. रामनवमीच्या पावन पर्वावर शहरात भक्ती, उत्साह आणि एकतेचा अद्भुत संगम पाहायला मिळत आहे.
श्रीराम नवमी उत्सव समिती व बजरंग दल मारेगाव यांच्या संयुक्त विद्यमाने आज, दि. २६ मार्च रोजी सायंकाळी ४:३० वाजता नगर पंचायतजवळील हनुमान मंदिर येथून या भव्य शोभायात्रेला सुरुवात होणार आहे. मार्डी रोड, राष्ट्रीय विद्यालय, पोलीस स्टेशन मार्ग, आंबेडकर चौक आणि बाळासाहेब ठाकरे चौक अशा प्रमुख मार्गांवरून ही शोभायात्रा मार्गक्रमण करत पुन्हा हनुमान मंदिरात समारोपाला येणार आहे.
शहरातील प्रत्येक रस्ता, चौक आणि गल्ली भगव्या ध्वजांनी सजली असून “श्री राम नाम सर्वत्र, सर्व हिंदू एकत्र” या घोषणांनी वातावरण भारावून गेले आहे. शोभायात्रेदरम्यान विविध ठिकाणी प्रभू श्रीरामांच्या प्रतिमांचे पूजन, फुलांचा वर्षाव आणि जल्लोषात स्वागत केले जाणार आहे.
विशेष म्हणजे, या सोहळ्याला अधिक भव्य करण्यासाठी आकर्षक देखावे, ढोल-ताशांचा गजर आणि युवकांचा उस्फूर्त सहभाग पाहायला मिळणार आहे. संपूर्ण तालुक्यातील भाविकांनी मोठ्या संख्येने सहभागी व्हावे, असे आवाहन आयोजकांकडून करण्यात आले आहे.
दरम्यान, कार्यक्रम सुरळीत पार पडावा यासाठी स्थानिक प्रशासनानेही कडक बंदोबस्त ठेवला असून सर्वत्र दक्षता घेतली आहे.
आज मारेगावात फक्त एकच नाद… ‘जय श्रीराम!’