बातमी ऐका (Marathi Voice Reader)
बीड : शेतीतून चांगले उत्पन्न मिळवायचे असेल तर मोठ्या क्षेत्राचीच गरज असते असे नाही. योग्य नियोजन आणि मेहनतीच्या जोरावर कमी क्षेत्रातही लाखोंचे उत्पन्न मिळवता येते. बीड जिल्ह्यातील हनुमान कोळसे यांनी हे सिद्ध करून दाखवले आहे. अवघ्या तीन एकर क्षेत्रात केळीची लागवड करून त्यांनी शेतीतून आर्थिक प्रगती साधली आहे. त्यांची केळी शेती परिसरातील शेतकऱ्यांसाठी चर्चेचा विषय ठरत आहे. याबाबतच लोकल18 च्या माध्यमातून जाणून घेऊ.
हनुमान कोळसे यांनी आपल्या तीन एकर क्षेत्रात केळीची लागवड केली आहे. केळी पिकातून त्यांना दरवर्षी चांगले उत्पादन मिळत असून मागील वर्षी त्यांनी तब्बल १०० टन केळीचे उत्पादन घेतले. या उत्पादनाच्या माध्यमातून त्यांना १५ ते १६ लाख रुपयांपर्यंत उत्पन्न मिळाले होते. कमी क्षेत्रात एवढ्या मोठ्या प्रमाणात उत्पादन घेऊन त्यांनी पारंपरिक शेतीपेक्षा वेगळा मार्ग निवडला आहे. केळी पिकाने त्यांना आर्थिक हातभार लावण्याबरोबरच शेतीतून चांगले उत्पन्न मिळवण्याचा आत्मविश्वासही दिला आहे.
Hapus Mango: कोकणचा राजा बाजारात दाखल, देवगड हापूसच्या पहिल्याच पेटीला मिळाला तब्बल इतका भाव
मागील वर्षी मिळालेल्या यशानंतर यंदाही त्यांनी केळी लागवड केली. यावर्षी त्यांच्या शेतातील केळीचे उत्पादन आतापर्यंत सुमारे ८० टनांपर्यंत पोहोचले आहे. विशेष म्हणजे अद्यापही त्यांच्या शेतातील केळीची तोडणी सुरू आहे. त्यामुळे अंतिम उत्पादनात आणखी वाढ होण्याची शक्यता आहे. गेल्या वर्षीच्या तुलनेत यंदा उत्पादनाचे प्रमाण काहीसे कमी असले तरी तीन एकरांतून मिळालेले ८० टन उत्पादनही उल्लेखनीय मानले जात आहे.
शेतीमध्ये वाढता उत्पादन खर्च, मजुरीचे दर आणि बाजारभावातील चढ-उतार यामुळे शेतकऱ्यांसमोर आर्थिक अडचणी निर्माण होत आहेत. अशा परिस्थितीत कमी क्षेत्रात अधिक उत्पादन घेण्याचे नियोजन करणे महत्त्वाचे ठरत आहे. हनुमान कोळसे हे केळी पिकाच्या माध्यमातून दरवर्षी किमान १५ ते १६ लाख रुपयांचा निव्वळ नफा मिळवत आहेत. त्यामुळे पारंपरिक पिकांच्या तुलनेत नगदी पिकांकडे वळणाऱ्या शेतकऱ्यांसाठी त्यांची शेती प्रेरणादायी ठरत आहे.
एकीकडे अनेक शेतकरी अधिक क्षेत्र असूनही अपेक्षित उत्पन्न मिळवण्यासाठी संघर्ष करत आहेत तर दुसरीकडे हनुमान यांनी अवघ्या तीन एकरांतून लाखोंची कमाई करण्याचा मार्ग शोधला आहे. मागील वर्षी १०० टन उत्पादन आणि यंदा आतापर्यंत ८० टन उत्पादन अशी त्यांची कामगिरी राहिली आहे. केळी पिकातून सातत्याने मिळणारे उत्पन्न पाहता कमी क्षेत्रातही शेती फायदेशीर ठरू शकते हे त्यांनी दाखवून दिले आहे.
