यश मिळविण्यासाठी कोणताही शॉर्टकट नसतो. विद्यार्थ्यांनी आत्मविश्वास व जिद्द बाळगून त्यास कठोर परिश्रमाची जोड देत सातत्याने प्रयत्न केल्यास यशाचे शिखर निश्चीत गाठता येते, असे प्रतिपादन खासदार भास्कर भगरे यांनी केले. राष्ट्रवादी काँग्रेस शरदचंद्र पवार पक्षातर्फे श्रीमती जे. आर. गुंजाळ विद्यालयातील सभागृहात आयोजीत तालुक्यातील इयत्ता दहावी व बारावीतील गुणवंत विद्यार्थ्यांच्या गुणगौरव सोहळ्यात ते बोलत होते. अध्यक्षस्थानी मविप्र सरचिटणीस अॅड. नितीन ठाकरे तर प्रमुख अतिथी म्हणून खासदार भास्कर भगरे, जिल्हाध्यक्ष दत्तात्रेय पाटील उपस्थित होते. व्यासपीठावर आयोजक चांदवड तालुकाध्यक्ष डॉ. सयाजीराव गायकवाड, खंडेराव आहेर, शहाजी भोकनळ, शिवाजी बस्ते, अॅड. पोपटराव पवार, रामकृष्ण तिडके आदी उपस्थित होते. प्रास्ताविकात डॉ. सयाजीराव गायकवाड यांनी तालुक्यातील नैपुण्य मिळविणाऱ्या विद्यार्थ्यांच्या पाठीवर शाबासकीची थाप मिळावी, आत्मविश्वास वाढून त्यांचे करियर घडावे व त्यांना प्रोत्साहन, प्रेरणा मिळावी, या उद्देशाने या सोहळ्याचे आयोजन करण्यात आल्याचे सांगितले. अॅड. नितीन ठाकरे यांनी संस्थेतर्फे आयोजीत रोजगार मेळाव्यांतून आतापर्यंत ९ हजार विद्यार्थ्यांना रोजगार प्राप्त झालेला असून वर्षभरात २५ हजार विद्यार्थ्यांना रोजगाराच्या संधी उपलब्ध होणार असल्याचेही त्यांनी सांगितले. मान्यवरांच्या हस्ते इयत्ता दहावी व बारावीमध्ये प्रथम व द्वितीय क्रमांकाने उत्तीर्ण १७० व नैपुण्य मिळविणाऱ्या विद्यार्थ्यांचा सन्मान करण्यात आला. सूत्रसंचालन प्राचार्य दिलीप पवार यांनी केले. तर दत्तात्रय वाघचौरे यांनी आभार मानले. कार्यक्रमास प्रकाश शेळके, साधना पाटील, संजय भांबर, अभिजीत ठाकरे, म्हसू गागरे, अरुण न्याहारकर, अभिजीत ठाकरे आदी उपस्थित होते. आर्यन नीलेश ठाकरे व महेश जाधव यांचा सत्कार तालुक्यातील आर्यन नीलेश ठाकरे याने आयआयटी ऑल इंडिया रँक १४७० मिळविल्याबद्दल तसेच महेश शांताराम जाधव याची महाराष्ट्र पोलिस दलात निवड झाल्याबद्दल त्यांचा मान्यवरांच्या हस्ते विशेष सत्कार करण्यात आला.
