दुचाकीस्वार जागीच ठार तर एक गंभीर जखमी
करंजी ते मारेगाव राज्य महामार्गावरील शिवणाळा फाट्याजवळील घटना
सुरेश पाचभाई मारेगाव,
करंजी कडून मारेगाव कडे जात असलेल्या भरधाव पिकपने विरुद्ध दिशेने येणाऱ्या दुचाकी स्वाराला समोरासमोर धडक दिली.यात दुचाकीस्वार जागीच ठार झाल्या तर एक गंभीर जखमी झाल्याची घटना राज्य महामार्गावरील शिवणाळा फाट्याजवळ घडली. ही घटना आज दिनांक 23 ऑक्टोंबर 2024 रोज बुधवारला सायंकाळी 7:30 वाजताचे दरम्यान घडली.
रवींद्र रामकृष्ण अवताडे वय अंदाजे 35 वर्ष रा.खडकी ता.मारेगाव असे अपघातात जागीच ठार झालेल्या दुचाकीस्वार व्यक्तीचे नाव आहे.तर अतुल वसंतराव किनाके वय 28 वर्ष रा खडकी हा गंभीर जखमी झाला आहे.
रवींद्र याचे शेत मारेगाव ते करंजी राज्य महामार्गावरील शिवणाळा फाट्यालागत आहे. रवींद्र आणि त्यांच्या ट्रॅक्टर ड्रायव्हर अतुल हे दोघे शेतातील काम आटोपून सायंकाळच्या सुमारास खडकी येथे घराकडे जायला निघाले पण समोरून येणाऱ्या भरधाव पिकपने त्यांच्या दुचाकीला जबर धडक दिली या धडकेत रवींद्र याचा मृत्यू झाला असून अतुल याला गंभीर दुखापत झाली आहे.
अपघात होताच रस्त्याने ये-जा करणाऱ्या काही नागरिकांनी लगेच मारेगाव पोलिसांना घटनेची माहिती दिली.माहिती मिळताच मारेगाव पोलीस घटनास्थळी दाखल झाले.काही नागरिकांनी व पोलिसांनी जखमींना मारेगाव येथील ग्रामीण रुग्णालयात दाखल केले पण तेथील डॉक्टरांनी रवींद्र याला मृत घोषित केले.
तर अतुल हा गंभीर जखमी असल्याने त्याच्यावर प्राथमिक उपचार करून त्याला पुढील उपचारासाठी यवतमाळ येथे स्थलांतरित केल्याची माहिती आहे.रवींद्र यांचे पश्चात पत्नी व दोन मुले सारंग वय 10 वर्ष व संघर्ष वय 6 वर्ष असा आप्त परिवार आहे.या अपघाताचा पुढील तपास मारेगाव पोलीस करीत आहे.
रवींद्र याचा मोठा भाऊ समीर याचा पण अंदाजे 23 वर्षा पूर्वी करणवाडी फाट्या जवळ झालेल्या भीषण अपघातात जागीच मृत्यू झाला होता.दोन्ही भाऊ अपघातामध्ये गेल्याने गावासह परिसरात हळहळ व्यक्त केली जात आहे व त्यांच्या कुटुंबावर दुःखाचा डोंगर कोसळला आहे
