आगामी महानगरपालिका निवडणुकीच्या तोंडावर राज्यातील राजकीय समीकरणे वेगाने बदलत आहेत. एकीकडे मुंबईत महायुतीत तणाव असतानाच, पिंपरी-चिंचवडमध्ये भाजपला रोखण्यासाठी अजित पवार गट आणि शरद पवार गट एकत्र येण्याची चिन्हे आहेत. शरद पवार गटाचे शहराध्यक्ष तुषार कामठे यांनी अजित पवार यांची बंद दाराआड भेट घेऊन, दोन्ही राष्ट्रवादींनी एकत्र निवडणूक लढवण्याचा प्रस्ताव दिल्याने राजकीय वर्तुळात खळबळ उडाली आहे. या भेटीनंतर प्रतिक्रिया देताना तुषार कामठे यांनी सांगितले की, स्थानिक पातळीवर भाजपविरोधात लढू शकणाऱ्या शिव-शाहू-फुले-आंबेडकर विचारांच्या पक्षांना सोबत घेण्याचे अधिकार आम्हाला वरिष्ठांनी दिले आहेत. भ्रष्टाचारी भाजपला सत्तेपासून दूर ठेवायचे असेल, तर दोन्ही राष्ट्रवादींनी एकत्र लढणे गरजेचे आहे. हाच प्रस्ताव घेऊन मी दादांकडे गेलो होतो. देवेंद्र फडणवीस यांनी राष्ट्रवादीसोबत लढणार नसल्याचे संकेत दिल्यानंतर, कामठे यांच्या या प्रस्तावाला महत्त्व प्राप्त झाले आहे. दुसरीकडे, मुंबई महानगरपालिकेतही अजित पवारांची राष्ट्रवादी काँग्रेस स्वबळावर लढण्याच्या तयारीत आहे. राष्ट्रवादीच्या निवडणूक निर्णय समितीच्या बैठकीत मुंबईतील किमान 50 जागांवर स्वतंत्रपणे लढण्याची तयारी पूर्ण करण्यात आली आहे. एकनाथ शिंदे यांनी शिवसेना आणि भाजप युतीत लढणार असल्याचे जाहीर केले असले, तरी अजित पवारांचा गट महायुतीत राहणार की नाही, याचा अंतिम निर्णय खुद्द अजित पवारच घेणार आहेत. पुण्यातील तब्बल 12 तासांच्या मॅरेथॉन बैठकांनंतर अजित पवार मुंबईकडे रवाना झाले असून, ते पिंपरी-चिंचवडबाबत काय भूमिका घेतात, याकडे सर्वांचे लक्ष लागले आहे.
पिंपरीत भाजपला रोखण्यासाठी दोन्ही राष्ट्रवादी एकत्र?:शरद पवार गटाच्या शहाराध्यक्षांनी घेतली अजित पवारांची भेट, काय म्हणाले तुषार कामठे?
Ad Banner
Show Comments (0)
Hide Comments (0)
Subscribe
Login
0 Comments
Oldest
