बातमी ऐका (Marathi Voice Reader)
संगमनेर येथे झालेल्या व्यवसाय मार्गदर्शन व समुपदेशन स्पर्धेतून शेवगाव तालुक्यातील बेलगाव जिल्हा परिषद शाळेतील शिक्षक युवराज जगताप यांची राज्यस्तरावर निवड झाली. जिल्हा शिक्षण आणि प्रशिक्षण संस्थाच्या वतीने विभागीय स्तरीय स्पर्धा संगमनेर येथे झाली. या स्पर्धेत शिक्षक युवराज जगताप यांनी व्यवसाय मार्गदर्शन व समुपदेशन यात भाग घेतला. त्यात त्यांनी सुमारे २००० शब्दांचा अहवाल, १२ पानांचे प्रेझेंटेशन सादर केले, तसेच करिअर निवडताना येणाऱ्या अडचणी व त्यावर उपाययोजना यावर मार्गदर्शन केले. त्यांच्या उत्कृष्ट सादरीकरणाबद्दल त्यांची मुंबई येथे होणाऱ्या राज्यस्तरावर निवड झाली. शासकीय, स्थानिक स्वराज्य संस्था, अनुदानित, अंशतः अनुदानित प्राथमिक, माध्यमिक व उच्च माध्यमिक शाळांमध्ये शिक्षक शिक्षकेतर कर्मचारी डायटमधील अधिकारी कर्मचारी तसेच शिक्षण विभागाच्या पर्यवेक्षीय यंत्रणेतील अधिकारी कर्मचाऱ्यात शैक्षणिक प्रशासकीय कौशल्य वृद्धिंगत करणे त्यांच्यात समन्वय सहकार्य व स्पर्धात्मकतेची भावना निर्माण करणे तसेच त्यांच्या डिजिटल भाषिक व सादरीकरण कौशल्यांना चालना देण्याच्या उद्देशाने तालुका जिल्हा व राज्यस्तरावर विविध स्पर्धांचे आयोजन शैक्षणिक वर्ष २०२५-२६ पासून करण्यात येत आहे.या स्पर्धेच्या आयोजनासाठी निकष आणि नियमावली तयार करण्यात आली आहे. ही स्पर्धा ४३ विषयांवर आधारित असते. प्रत्येक जिल्ह्याला वेगवेगळे विषय दिले जातात. या निवडीबद्दल शिक्षक जगताप यांचे शेवगाव तालुका गटशिक्षणाधिकारी शैलजा राऊळ व बालानंद परिवारातर्फे अभिनंदन करून आगामी स्पर्धेसाठी शुभेच्छा दिल्या.
