बातमी ऐका (Marathi Voice Reader)
शहरातील स्वच्छतेचे केंद्रीय कंत्राट मिळवणाऱ्या कोणार्क इन्फ्रास्ट्रक्चर लि.च्या झोन क्र. ४, बडनेरा येथील स्वच्छता कर्मचाऱ्यांनी मागील तीन महिन्यांपासून नियमित वेतन मिळत नसल्यामुळे हातातील झाडू खाली ठेवत कामबंद आंदोलन केले. कोणार्कच्या सफाई कामगारांबाबतच्या एकूणच धोरणामुळे शहरात आधीच स्वच्छतेबाबत बोंब असताना कर्मचारी दिवसभर कामबंद आंदोलन करीत असल्यामुळे पुन्हा या परिसरातील स्वच्छतेचा मुद्दा ऐरणीवर आला आहे. कोणार्कला स्वच्छतेचे कंत्राट दिल्यापासून कोणत्या ना कोणत्या कारणामुळे ही कंपनी सतत चर्चेत आहे. यांच्याकडे कचरा वाहून नेणारी वाहने फिट नाहीत, असा सातत्याने आरोप होत आहे. कर्मचाऱ्यांना वेळेवर वेतन मिळत नाही. त्यांचा ईपीएफ कंपनीकडून नियमित भरला जात नाही. त्यांना ईएसआयसी अर्थात आरोग्याचा प्रश्न उद्भवल्यास तशी सोय करण्यात आली नसल्याची ओरड कर्मचारी सातत्याने करीत आहेत. बडनेरा येथील कर्मचाऱ्यांनीही याच मागण्यांच्या पूर्ततेसाठी कामबंद आंदोलन केल्यामुळे शहराच्या या उपनगरात दिवसभर स्वच्छताच झाली नाही. त्यामुळे येथे सर्वत्र कचरा दृष्टीस पडत होता. महिनाभरात दुसरे आंदोलन सुमारे २५ दिवसांआधी इर्विन चौकात कोणार्कचे ८० सफाई कर्मचारी, कचऱ्याचे वाहन चालवणारे चालक व इतर कर्मचाऱ्यांनी कामबंद आंदोलन केले होते. यावेळी स्थायी समिती सभापती अविनाश मार्डीकर यांनी यशस्वीपणे मध्यस्थी केली. १५ दिवसांच्या आत थकलेले वेतन मिळेल, असे आश्वासन दिल्यानंतर एका दिवसांतच आंदोलन शमले होते. आता बडनेरा येथील ६० सफाई कर्मचाऱ्यांनी आंदोलन सुरू केले आहे. नियमितपणे वेतन मिळत नसल्यामुळे सफाई कर्मचारी नाराज आहेत.
