सुरेश पाचभाई मारेगाव
मारेगाव तालुक्यातील करणवाडी नगरीमध्ये समस्त ग्रामवासीयांच्या वतीने अखंड श्रीकृष्ण कथा सप्ताह सोहळ्याचे भव्य आयोजन करण्यात येणार आहे. हा धार्मिक व सांस्कृतिक सोहळा दि. १६ ते २२ जानेवारी २०२६ या कालावधीत दुपारी १.०० ते ५.०० या वेळेत श्री. तात्याजी लटारी जिवतोडे यांच्या शेतात, जिल्हा परिषद शाळेसमोर, करणवाडी येथे संपन्न होणार आहे.
या कथा सप्ताहात परमपूज्य धर्माचार्य प.पू. श्री. कृष्णकुमार पाण्डेय महाराज (श्रीक्षेत्र काशी, वाराणसी, उ.प्र.) यांच्या सुमधुर वाणीतून श्रीकृष्ण कथेचे अमृतमय कथन होणार आहे. तसेच भारूड प्रबोधनकार श्री. संतोष महाराज भालेराव (वाशीम) यांचे भारूड, तर किर्तनकार आ. ह.भ.प. श्री. प्रकाश महाराज वाघ यांचे प्रभावी किर्तन होणार आहे.
दि. १६ जानेवारी रोजी सकाळी ११ वाजता भव्य कलश यात्रा व दीपप्रज्वलनाने कार्यक्रमाचा शुभारंभ होईल. कथा सप्ताहादरम्यान विविध वारकरी मंडळांचे हरिपाठ, भजन, किर्तन, भारूड व सांस्कृतिक कार्यक्रमांचे आयोजन करण्यात आले आहे. दररोज सकाळी ६.०० ते ७.०० व सायंकाळी ६.०० ते ६.३० या वेळेत सामूहिक प्रार्थना कार्यक्रम होणार आहे.
सायंकाळी ८.०० ते १०.०० या वेळेत दररोज विविध भजन मंडळांचे कार्यक्रम सादर केले जाणार आहेत. दि. २२ जानेवारी रोजी भव्य ग्रंथ शोभायात्रा व भजन होणार असून, दि. २३ जानेवारी २०२६ रोजी दुपारी १२.०० ते ३.०० या वेळेत गोपाल काला व किर्तन सोहळा आयोजित करण्यात आला आहे.
या प्रसंगी यांचे किर्तन,परमपूज्य धर्माचार्य प.पू. श्री. कृष्णकुमार पाण्डेय महाराज (श्रीक्षेत्र काशी, वाराणसी, उ.प्र.) वृंदावन येथील श्री. राम बाबा यांच्या झांकी, तसेच नामवंत गायक व वादकांची साथ लाभणार आहे. भाविकांसाठी सायंकाळी ५.०० वाजल्यापासून महाप्रसाद (भोजन) ठेवण्यात आला आहे.या पवित्र व भक्तिमय सोहळ्याचा लाभ घ्यावा, असे आवाहन आयोजक समस्त करणवाडी ग्रामवासी यांनी केले आहे.
