वसई-विरारमध्ये राजकीय भूकंप; मनसे-बविआ युती पक्की:युतीचा खेळ रंगला; निकाल कोणाच्या बाजूने? मोठा राजकीय स्फोट

राज्यातील महानगरपालिका निवडणुकांच्या पार्श्वभूमीवर राजकीय घडामोडींना वेग आला असून वसई-विरार महानगरपालिकेबाबत मोठी राजकीय हालचाल समोर आली आहे. येत्या 15 जानेवारी 2026 रोजी राज्यातील सर्व महापालिकांसाठी मतदान होणार असून 16 जानेवारीला मतमोजणी होणार आहे. या निवडणुकांसाठी सर्वच पक्ष जोरदार तयारीत असताना वसई-विरारमध्ये मात्र समीकरणे पूर्णपणे बदलताना दिसत आहेत. मिळालेल्या माहितीनुसार, वसई-विरार महानगरपालिका निवडणुकीत महाराष्ट्र नवनिर्माण सेना आणि बहुजन विकास आघाडी एकत्र येऊन निवडणूक लढवणार आहेत. या युतीमुळे स्थानिक राजकारणात मोठी खळबळ उडाली असून अनेक पक्षांची गणितं बदलण्याची शक्यता निर्माण झाली आहे. सूत्रांच्या माहितीनुसार, मनसे आणि बहुजन विकास आघाडी यांच्यातील युती जवळपास निश्चित झाली असून अंतिम घोषणा लवकरच होण्याची शक्यता आहे. वसई-विरारमध्ये मनसेची सध्या एकही नगरसेवकाची जागा नसल्याने पक्ष विस्तारासाठी मनसेने हा महत्त्वाचा निर्णय घेतल्याचे बोलले जात आहे. दुसरीकडे बहुजन विकास आघाडीने युतीसाठी अट ठेवली असून, भाजप आणि शिंदे गटाच्या शिवसेनेला सत्तेपासून दूर ठेवायचे असेल तर आपल्या पक्षाच्या चिन्हावरच निवडणूक लढवावी लागेल, अशी भूमिका बविआकडून मांडण्यात आली आहे. या चिन्हाच्या अटीवर मनसेमध्ये अंतर्गत चर्चा सुरू असून येत्या दोन दिवसांत याबाबत अंतिम निर्णय घेतला जाण्याची शक्यता वर्तवली जात आहे. या युतीमुळे वसई-विरारमधील राजकीय समीकरणे पूर्णपणे बदलू शकतात. दरम्यान, या घडामोडींमध्ये ठाकरे गटाची शिवसेना मात्र स्वबळावर निवडणूक लढवण्याच्या तयारीत असल्याची माहिती समोर आली आहे. मनसे आणि बविआसोबत जाण्याबाबत ठाकरे गटाकडून सकारात्मक प्रतिसाद नसल्याचे सूत्रांकडून सांगितले जात आहे. त्यामुळे वसई-विरारमध्ये यावेळी त्रिकोणी किंवा चौरंगी लढत पाहायला मिळण्याची शक्यता आहे. एकीकडे बविआ-मनसे युती, दुसरीकडे भाजप-शिंदे गट आणि त्याचवेळी ठाकरे गटाची शिवसेना स्वतंत्र मैदानात उतरणार असल्याने निवडणूक अधिक चुरशीची ठरणार आहे. स्थानिक पातळीवर कार्यकर्त्यांची जुळवाजुळव, जागावाटप आणि प्रचार रणनीती यावर सध्या सर्वच पक्षांचे लक्ष केंद्रित झाले आहे. वसई-विरार महानगरपालिकेचा राजकीय इतिहास पाहिला तर बहुजन विकास आघाडीचे वर्चस्व याठिकाणी कायम राहिले आहे. नगरसेवकांचा कार्यकाळ 28 जून 2020 रोजी संपल्यानंतर विविध कारणांमुळे निवडणुका पुढे ढकलल्या गेल्या आणि महापालिकेत प्रशासकीय राजवट लागू राहिली. सध्या वसई-विरार महानगरपालिकेत एकूण 29 प्रभाग असून 115 नगरसेवकांची सदस्यसंख्या आहे. यापैकी 58 जागा महिलांसाठी तर 57 जागा पुरुषांसाठी राखीव ठेवण्यात आल्या आहेत. अनुसूचित जाती आणि अनुसूचित जमातींसाठी प्रत्येकी 5 जागांचे आरक्षण असून त्यापैकी प्रत्येकी 2 जागा महिलांसाठी राखीव आहेत. उर्वरित 74 जागा सर्वसाधारण प्रवर्गासाठी आहेत. या आरक्षणाच्या गणितामुळे उमेदवार निवडीत पक्षांना मोठी कसरत करावी लागणार आहे. 2015 च्या वसई-विरार महानगरपालिका निवडणुकीत बहुजन विकास आघाडीने एकतर्फी वर्चस्व गाजवत 106 जागा जिंकल्या होत्या. त्या निवडणुकीत भाजपला केवळ एकच जागा मिळाली होती, तर शिवसेनेला 5 जागांवर समाधान मानावे लागले होते. काँग्रेस आणि राष्ट्रवादी काँग्रेसला एकही जागा मिळाली नव्हती, तर 3 जागा अपक्ष आणि इतरांच्या खात्यात गेल्या होत्या. या पार्श्वभूमीवर आता मनसेसोबत युती केल्यास बविआ आपले वर्चस्व टिकवते का, की नव्या समीकरणांमुळे सत्तासंघर्ष अधिक रंगतो, हे पाहणे महत्त्वाचे ठरणार आहे. आगामी निवडणूक वसई-विरारच्या राजकारणाला नवी दिशा देणारी ठरणार, यात शंका नाही.