बातमी ऐका (Marathi Voice Reader)
नांदेड जिल्ह्यातील अर्धापूर तालुक्यातील दाभड येथे बुधवारी एका वृद्ध महिलेची डोक्यात दगड घालून निर्घृण हत्या करण्यात आली. पार्वतीबाई सूर्यवंशी असे मृत महिलेचे नाव आहे. शेतात जाताना त्यांचा खून करण्यात आला. दाभड येथील रहिवासी पार्वतीबाई सूर्यवंशी (75) 28 जानेवारी रोजी सकाळी शेताकडे जाण्यासाठी निघाल्या होत्या. त्यानंतर सायंकाळी उशिरापर्यंत त्या घरी पोहोचल्या नाही. त्यानंतर कुटुंबीयांनी शेतात जाऊन पाहणी केली असता त्या शेतातही दिसल्या नाही. त्यामुळे नातेवाईकांनी त्यांचा शोध घेण्यास सुरुवात केली. त्यानंतर त्यांचा मृतदेह दाभड शिवारातील एका विहिरीजवळ आढळला. चोरीच्या उद्देशाने त्यांच्या डोक्यात दगड घालून त्यांची निर्घृण हत्या करण्यात आल्याचे सकृतदर्शनी दिसत आहे. या घटनेची माहिती मिळताच पोलिस अधीक्षक अविनाश कुमार, अप्पर पोलिस अधीक्षक अर्चना पाटील, पोलिस निरीक्षक चंद्रशेखर कदम, सपोनि, दत्तात्रय मनठाळे आदींनी घटनास्थळी धाव घेऊन स्थितीचा आढावा घेतला. पार्वतीबाई सूर्यवंशी यांच्या हत्येचे कारण अद्याप स्पष्ट झाले नाही. पण हा प्रकार चोरीच्या उद्देशाने झाला असावा असा दावा केला जात आहे. या प्रकरणी न्यायवैद्यक तपास पथकाच्या माध्यमातूनही तपास केला जात आहे. पार्वतीबाई सूर्यवंशी यांच्या मृत्यूपूर्वीचे एक सीसीटीव्ही फुटेज समोर आले आहे. त्यात त्या एका तरुणासोबत जाताना दिसून येत आहेत. हा तरुण येथीलच एका ढाब्यावर काम करणारा असल्याचे समजते. पोलिस त्याची चौकशी करत आहेत.
