दाटेगाव शिवारात 263 झाडांना पाय फुटले?:टाटा पॉवरकडून झाडांची कत्तल, वन विभागाचा अहवाल; झाडे तोडली नसल्याचा कंपनीचा दावा

हिंगोली तालुक्यातील दाटेगाव, लोहगाव भागात सौर उर्जा प्रकल्प उभारणीसाठी टाटा पॉवर कंपनीकडून २६३ झाडांची विना परवानगी कत्तल केल्याचे वन विभागाच्या पाहणीमध्ये स्पष्ट झाले आहे. शेतकऱ्यांच्या तक्रारीनंतर हि पाहणी करण्यात आली होती. तर दुसरीकडे टाटा पॉवरने आम्ही झाडे तोडलीच नसल्याचा दावा केला आहे. त्यामुळे झाडे तोडली कोणी हा संशोधनाची भाग झाला असून तुर्तास तरी २६३ झाडांना पाय फुटले काय? अशी विचारणा शेतकऱ्यांकडून केली जात आहे. हिंगोली तालुक्यातील दाटेगाव,लोहगाव परिसरात टाटा पॉवर कंपनीकडून १२०० एकर जमीन शेतकऱ्यांकडून २९ वर्षाच्या भाडेकरारावर घेण्यात आली आहे. या ठिकाणी सौर ऊर्जा प्रकल्पाच्या उभारणीचे काम पूर्ण करण्यात आले असून यातून निर्माण होणारी ऊर्जा विज कंपनीला दिला जात आहे. दरम्यान, या प्रकल्पाच्या उभारणीसाठी कंपनीकडून जमीनीचे सपाटीकरण करतांना मोठ्या प्रमाणावर वृक्षतोड करण्यात आल्याची तक्रार शेतकरी सुनील माने यांनी केली आहे. विशेष म्हणजे यासाठी कृषी विभागाची कोणत्याही प्रकारची परवानगी घेण्यात आली नसल्याचा आरोप शेतकरी माने यांनी केला आहे. या प्रकाराची चौकशी करून दोषींवर कारवाई करण्याची मागणी त्यांनी केली होती. या संदर्भात माने यांनी वन विभागाकडे माहितीच्या अधिकारात माहिती मागविल्यानंतर वन विभागाने संबंधित कंपनीकडून कुठल्याही प्रकारची परवानगी घेतली नसल्याचे लेखी उत्तर दिले होते. त्यानंतर विभागीय वन अधिकारी राजेंद्र नाळे यांनी तातडीने चौकशी करून अहवाल सादर करण्याच्या सूचना दिल्या होत्या. त्यानुसार वन परिक्षेत्र अधिकारी मीनाक्षी पवार यांच्यासह १० कर्मचाऱ्यांच्या पथकाने मागील १५ दिवसांत प्रत्येक ठिकाणी जाऊन तोडलेल्या झाडांची पाहणी केली आहे. यामध्ये तब्बल २२४७ झाडे तोडण्यात आल्याचे दिसून आले. यामध्ये इतर झाडांना तोडण्याची परवानगीची गरज नसली तरी २६३ झाडांची तोडणी करतांना परवानगीची गरज होती. मात्र संबंधित कंपनीने तोडणीसाठी परवानगी घेतलीच नसल्याचे स्पष्ट झाले आहे. या संदर्भातील अहवाल वरिष्ठ कार्यालयाकडे सादर केला असून आता टाटा पॉवर कंपनीवर काय कारवाई केली जाणार याकडे परिसरातील शेतकऱ्यांचे लक्ष लागले आहे. दंडाची नोटीस पाठविली जाणार – राजेंद्र नाळे, विभागीय वन अधिकारी हिंगोली संबंधित कंपनीने २६३ झाडांची तोडणी करण्यासाठी परवानगी आवश्‍यक असतांना वन विभागाची परवानगी घेतली नाही. त्यामुळे आता संबंधित कंपनीला प्रती झाड एक हजार रुपये या प्रमाणे दंडाची नोटीस दिली जाणार आहे. त्यानंतरच पुढील कारवाई केली जाईल. आम्ही झाडे तोडलीच नाही – अविनाश राठोड, स्थानिक अधिकारी टाटा पॉवर कंपनी या भागात १२०० एकर नव्हे तर केवळ ७०० एकर जमीन शेतकऱ्यांकडून घेण्यात आली. त्यापैकी ५५० एकरवर प्रकल्पाची उभारणी करण्यात आली आहे. या प्रकल्पासाठी आम्ही झाडे तोडलीच नाही तर शेतकऱ्यांनीच झाडे तोडली आहेत.