बातमी ऐका (Marathi Voice Reader)
अजित पवारांच्या पत्नी सुनेत्रा पवार आज उपमुख्यमंत्रीपदाची शपथ घेणार आहेत. त्यांच्या शपथविधीसाठी राजभवनातील तयारी सुरू झाली असून आज सायंकाळी 5 वाजता हा सोहळा पार पडणार आहे. उपमुख्यमंत्रिपदासोबतच सुनेत्रा पवार यांच्याकडे राष्ट्रवादी काँग्रेस पक्षाच्या राष्ट्रीय अध्यक्षपदाची जबाबदारीही सोपवण्यात येणार आहे. दरम्यान, राष्ट्रवादी काँग्रेस पक्षाची महत्त्वपूर्ण गटनेतेपदाची बैठक पार पडली. या बैठकीत दिलीप वळसे पाटील यांनी सुनेत्रा पवार यांच्या नावाचा प्रस्ताव मांडला. या प्रस्तावाला एकमताने मान्यता देण्यात आली असून छगन भुजबळ यांनी त्यांच्या नावाला अनुमोदन दिले. त्यामुळे सुनेत्रा पवार यांची एकमताने राष्ट्रवादी काँग्रेसच्या गटनेतेपदी निवड करण्यात आली आहे.
लोकभवनातील दरबार हॉलमध्ये शपथविधीच्या अनुषंगाने तयारी सुरू असून, सुरक्षा व प्रशासकीय यंत्रणा सज्ज झाली आहे.
राज्यपाल आचार्य देवव्रत संध्याकाळी सुमारे 4 वाजता मुंबईत दाखल होणार असून, संध्याकाळी 5.00 वाजता शपथविधी पार पडणार आहे.
सुनेत्रा पवार उपमुख्यमंत्रीपदाची शपथ घेणार आहेत, मर्यादित लोकांनाच उपस्थितीची परवानगी देण्यात आली आहे. अवघ्या 10 मिनिटांत साधेपणाने हा शपथविधी सोहळा पार पडणार असल्याची माहिती मिळत आहे.
खासदार सुनेत्रा पवार यांनी त्यांचा खासदारकीचा राजीनामा शनिवारी राज्यसभेचे सभापती व उपराष्ट्रपती सी. पी. राधाकृष्णन यांच्याकडे पाठवल्याची माहिती आहे. राज्याच्या पहिल्या महिला उपमुख्यमंत्री म्हणून सुनेत्रा पवार शपथ घेणार आहेत. त्यामुळे सर्वांचे याकडे लक्ष लागून राहिले आहे.
