अडेगाव येथील शेतकऱ्यांच्या लढ्याला यश
ज्ञानेश्वर आवारी झरी जामणी
झरी जामणी : अडेगाव येथील खंड क्रमांक १ मधील सर्वे नंबर ५१ येथे लोथा सोलर प्लॅन्टमुळे शेतात जाणाऱ्या वहिवाटीचा रस्ता बंद करण्यात आल्याने संतप्त झालेल्या शेतकऱ्यांनी सुरू केलेले आमरण उपोषण अखेर प्रशासनाच्या लेखी आश्वासनानंतर मागे घेण्यात आले.यामुळे शेतकऱ्यांच्या संघर्षाला यश मिळाले आहे.
लोथा सोलर प्लॅन्ट व शेतकरी दिवाकर दादाजी काळे यांनी सरकारी जमिनीवर अतिक्रमण करून शेतकऱ्यांचा वहिवाटीचा रस्ता बंद केल्याचा आरोप शेतकऱ्यांनी केला होता. याबाबत शेतकऱ्यांनी जिल्हाधिकारी यांच्याकडे निवेदन दिले; मात्र त्यावर कोणतीही कार्यवाही न झाल्याने २८ जानेवारीपासून तहसील कार्यालयासमोर आमरण उपोषणास सुरुवात करण्यात आली.
या उपोषणाला विविध सामाजिक व राजकीय मान्यवरांचा पाठींबा मिळाला.३० जानेवारी रोजी काही उपोषणकर्त्यांची प्रकृती बिघडल्याने कृषी उत्पन्न बाजार समितीचे माजी सभापती प्रकाश मॅकलवार तसेच तालुका काँग्रेस कमिटीचे उपाध्यक्ष सुरेंद्र गेडाम यांनी तहसीलदार रासणे व पोलीस निरीक्षक सतीश जाधव यांना याची माहिती दिली.
त्यानंतर नायब तहसीलदार प्रितम राजगडकर यांनी तात्काळ कार्यवाही करत रस्ता अडविणाऱ्या संबंधितांचे बयान नोंदवले. तसेच सोलर प्लॅन्ट अधिकाऱ्यांना रस्ता मोकळा करून देण्याचे आदेश दिले. सरकारी जमिनीवर अतिक्रमण करून रस्ता बंद केल्याप्रकरणी दिवाकर दादाजी काळे यांना लेखी आदेश देत दोन दिवसांत रस्ता खुला करण्याचे निर्देश देण्यात आले.
शुक्रवारी रात्री ९ वाजल्यानंतर शेतकऱ्यांच्या सर्व मागण्या मान्य झाल्याने नायब तहसीलदार प्रितम राजगडकर, पोलीस निरीक्षक सतीश जाधव, प्रकाश मॅकलवार, सुरेंद्र गेडाम, पटवारी बरशेट्टीवार मॅडम, बादल जाधव, राजू करमणकर, डॉ. मसीरकर, देवीदास पानघाटे आदी मान्यवरांच्या उपस्थितीत उपोषणकर्त्या शेतकऱ्यांनी आपले उपोषण मागे घेतले.
