साखरा गावाजवळ पोलिसांचा थरार; दोघांविरुद्ध गुन्हा दाखल
सुरेश पाचभाई मारेगाव
मारेगाव: तालुक्यात चोरट्या मार्गाने होणाऱ्या वाळू तस्करीला लगाम लावण्यासाठी मारेगाव पोलिसांनी धडक मोहीम हाती घेतली आहे. १० फेब्रुवारी रोजी पहाटेच्या सुमारास साखरा गावाजवळ पोलिसांनी एका टिप्परवर छापा टाकत ४ ब्रास अवैध रेतीसह ६ लाख २० हजार रुपयांचा मुद्देमाल जप्त केला. या प्रकरणी दोन तस्करांविरुद्ध गुन्हे दाखल करण्यात आले आहेत.
सविस्तर वृत्त असे की, मारेगाव पोलीस ठाण्याचे एएसआय दिगांबर किनाके आणि शुभम उईके हे मंगळवारी पहाटे बिट परिसरात गस्तीवर होते. कुंभा ते करनवाडी रोडवरील साखरा गावाजवळ पहाटे ३:३० ते ४:०० च्या दरम्यान त्यांना एम.एच. २९ टी १५३३ क्रमांकाचा टिप्पर संशयास्पदरीत्या येताना दिसला. पोलिसांनी तातडीने वाहन थांबवून पंचासमक्ष झडती घेतली असता, त्यात विनापरवाना ४ ब्रास वाळू साठा आढळून आला.
पोलिसांनी २० हजार रुपये किमतीची रेती आणि ६ लाख रुपये किमतीचा टिप्पर असा एकूण ६ लाख २० हजार रुपयांचा मुद्देमाल जप्त केला आहे. याप्रकरणी आरोपी ज्ञानेश्वर गणपतराव ठाकरे (५५, रा. कळंब) आणि सचिन दरने (४५, रा. हिवरा, ता. कळंब) यांच्यावर भारतीय न्याय संहितेच्या कलम ३०३(२), ४९, मोटार वाहन कायदा तसेच महाराष्ट्र जमीन महसूल संहितेच्या विविध कलमान्वये गुन्हा दाखल केला आहे.
सदर धडक कारवाई पोलीस निरीक्षक श्याम वानखेडे यांच्या मार्गदर्शनाखाली एएसआय दिगांबर किनाके व पोलीस शिपाई सागर दिपेवार, शुभम उईके यांनी पार पाडली. या कारवाईमुळे वाळू माफियांमध्ये एकच खळबळ उडाली आहे.
