सुरेश पाचभाई | मारेगाव
मारेगाव तालुक्यातील हिवरी येथील जिल्हा परिषद उच्च प्राथमिक शाळेत वार्षिक सांस्कृतिक कार्यक्रम व विद्यार्थी गुणगौरव सोहळा मोठ्या उत्साहात व थाटामाटात संपन्न झाला.
कार्यक्रमाच्या अध्यक्षस्थानी ग्रामपंचायत सरपंच सौ. इंदिराताई पीदुरकर होत्या, तर प्रमुख पाहुणे म्हणून शाळा व्यवस्थापन समितीचे अध्यक्ष ईश्वर थेरे उपस्थित होते.
यावेळी ग्रामपंचायत सदस्य युवराजजी आस्वले, गावातील ज्येष्ठ नागरिक गजानन पाटील, भगत विजयजी बोबडे, शाळा व्यवस्थापन समितीच्या उपाध्यक्षा तृप्ती सोमलकर, निलेश डावरे, अंगणवाडी सेविका फुलपात्र आत्राम तसेच तंटामुक्ती समितीचे अध्यक्ष गरिबा भोसले यांची प्रमुख उपस्थिती होती.
कार्यक्रमाची सुरुवात विद्येची देवता सरस्वती व महाराष्ट्राचे आराध्य दैवत छत्रपती शिवाजी महाराज यांच्या प्रतिमेचे पूजन करून करण्यात आली. विद्यार्थ्यांनी सादर केलेल्या देशभक्तिपर, सामाजिक व लोककला आधारित विविध सांस्कृतिक कार्यक्रमांनी उपस्थितांची मने जिंकली.
शाळेत वर्षभर राबविण्यात येणाऱ्या विविध उपक्रमांतर्गत घेण्यात आलेल्या चित्रकला, हस्ताक्षर, निबंध आदी स्पर्धांमध्ये यश संपादन करणाऱ्या विद्यार्थ्यांना प्रमाणपत्र, पुस्तके व पेन देऊन गौरविण्यात आले. तसेच सांस्कृतिक कार्यक्रमात सहभाग घेतलेल्या माजी विद्यार्थ्यांनाही प्रशस्तीपत्र व बॉटल देऊन सन्मानित करण्यात आले.
कार्यक्रमाचे सूत्रसंचालन अमोल वावरे सर यांनी केले. कार्यक्रमाचे आयोजन मुख्याध्यापक स्वप्नील नवघरे यांच्या मार्गदर्शनाखाली करण्यात आले. कार्यक्रमाला ग्रामस्थांनी उत्स्फूर्त प्रतिसाद देत सहकार्य केले. याबद्दल मुख्याध्यापक नवघरे यांनी सर्व ग्रामस्थांचे आभार मानले.
