नरहरी झिरवळांच्या क्लार्कच्या घराचीही झडती:एसीबीची कारवाई तीव्र; पक्ष्याच्या कोअर कमिटी बैठकीतही चर्चा शक्य; राजकीय हालचालींना वेग

मंत्रालयातील अन्न व औषध प्रशासनाच्या कार्यालयात लाच घेताना एका लिपिकाला लाचलुचपत प्रतिबंधक खात्याने रंगेहात पकडल्याची घटना उघड होताच राज्यातील राजकीय वर्तुळात मोठी खळबळ उडाली. या प्रकरणामुळे संबंधित खात्याचे मंत्री नरहरी झिरवळ अडचणीत आले आहेत. मंत्रालयातील त्यांच्या कार्यालयात कार्यरत कर्मचारी लाच घेताना सापडल्याने विरोधकांनी त्यांच्यावर जोरदार टीका सुरू केली आहे. राजीनाम्याची मागणीही पुढे आली आहे. या साऱ्या पार्श्वभूमीवर चौकशी यंत्रणांनी कारवाईचा वेग वाढवला आहे आणि प्रकरणाची सखोल छाननी सुरू केली आहे. या प्रकरणातील आरोपी कर्मचारी राजेंद्र ढेरिंगे याला सोमवारी न्यायालयात हजर केले जाणार असल्याची माहिती आहे. त्याआधी लाचलुचपत प्रतिबंधक खात्याने नाशिक रोड येथील त्याच्या घराची झडती घेतली. या झडतीदरम्यान काही महत्त्वाची कागदपत्रे जप्त करण्यात आल्याचे समोर आले आहे. या कागदपत्रांमधून आणखी माहिती उघड होण्याची शक्यता व्यक्त केली जात आहे. त्यामुळे या प्रकरणाचा तपास कोणत्या दिशेने पुढे जाईल आणि आणखी कोणाचे नाव समोर येईल का, याकडे सर्वांचे लक्ष लागले आहे. राजेंद्र ढेरिंगे हा मूळचा अन्न व नागरी पुरवठा विभागातील कर्मचारी असून सुमारे वर्षभरापूर्वी तो अन्न व औषध प्रशासन विभागात प्रतिनियुक्तीवर आला होता. तो मंत्र्यांच्या अपील विभागात कार्यरत असल्याची माहिती समोर आली आहे. त्यामुळे या प्रकरणाचे गांभीर्य वाढले आहे. प्रतिनियुक्तीवर आलेल्या कर्मचाऱ्याच्या कामकाजाची जबाबदारी आणि देखरेख यावरही प्रश्न उपस्थित होत आहेत. झडतीदरम्यान मिळालेली कागदपत्रे तपासासाठी महत्त्वाची ठरू शकतात. ही कागदपत्रे न्यायालयासमोर सादर केली जाऊ शकतात आणि त्यानंतर एसीबीकडून अधिक तपशील मांडला जाईल, अशी शक्यता आहे. ढेरिंगेच्या लाचखोरीचे धागेदोरे कुठपर्यंत पोहोचतात, हे पाहणे आता महत्त्वाचे ठरणार आहे. एसीबीचे अधिकारी न्यायालयात कोणती माहिती मांडतात आणि त्यातून आणखी काही स्फोटक तपशील पुढे येतात का, याबाबत उत्सुकता आहे. या प्रकरणामुळे मंत्रालयातील कामकाजावर आणि संबंधित विभागाच्या प्रतिमेवर परिणाम झाल्याची चर्चा सुरू आहे. चौकशीचा विस्तार वाढल्यास आणखी अधिकारी किंवा कर्मचारी तपासाच्या कक्षेत येण्याची शक्यता नाकारता येत नाही. दरम्यान, या सर्व घडामोडींच्या पार्श्वभूमीवर मंत्री नरहरी झिरवळ यांच्या हालचालींनाही वेग आल्याची माहिती आहे. गेल्या दोन दिवसांपासून ते सार्वजनिक कार्यक्रमांपासून दूर असल्याचे सांगितले जाते. त्यांचा मोबाईल फोन सध्या स्विच ऑफ असल्याची चर्चा आहे. आज ते उपमुख्यमंत्री सुनेत्रा पवार यांची भेट घेणार असल्याचे वृत्त आहे. तसेच राष्ट्रवादी काँग्रेस पक्षाच्या कोअर कमिटीची बैठकही बोलावण्यात आली असून, या बैठकीत झिरवळांच्या प्रकरणावर चर्चा होण्याची शक्यता वर्तवली जात आहे. याशिवाय झिरवळ लवकरच मुख्यमंत्री देवेंद्र फडणवीस यांची भेट घेऊन आपली भूमिका स्पष्ट करणार असल्याची माहिती समोर येत आहे. विरोधकांनी राजीनाम्याची मागणी तीव्र केल्याने राजकीय दबाव वाढला आहे. या पार्श्वभूमीवर पक्षांतर्गत चर्चा आणि पुढील रणनीती ठरवण्यासाठी हालचाली सुरू झाल्या आहेत. प्रकरणाचे गांभीर्य लक्षात घेता वरिष्ठ पातळीवर विचारमंथन होणार असल्याचे संकेत आहेत. प्रकरणाचा शेवट कुठे होतो, याकडे राज्याचे लक्ष या प्रकरणाबाबत प्रतिक्रिया देताना नरहरी झिरवळ यांनी स्पष्ट शब्दांत भूमिका मांडली आहे. माझ्या विभागातील क्लार्क लाच प्रकरणात सापडला, ही माझीही जबाबदारी आहे. ही जबाबदारी टाळता येणार नाही. त्याने जे कृत्य केले आहे, त्याला आम्ही पाठीशी घालणार नाही. या प्रकरणाची चौकशी व्हावी आणि चौकशीत जर या प्रकरणाचे धागेदोरे माझ्यापर्यंत आले तर मी मंत्रिपदाचा राजीनामा देईन, असे त्यांनी म्हटले आहे. त्यांच्या या वक्तव्यामुळे राजकीय वातावरणात आणखी चर्चा सुरू झाली आहे. आता तपास यंत्रणा काय निष्कर्ष काढते आणि या प्रकरणाचा शेवट कुठे होतो, याकडे राज्याचे लक्ष लागले आहे.