महसूल, आरोग्य आणि कृषी विभागाच्या योजनांचा एकाच छताखाली लाभ; तहसीलदार उत्तम निलावाड यांचा पुढाकार
सुरेश पाचभाई मारेगाव,
मारेगाव तालुक्यातील मार्डी येथे ‘छत्रपती शिवाजी महाराज महा राजस्व अभियाना’अंतर्गत आयोजित महाराजस्व समाधान शिबिराने प्रशासकीय गतीमानतेचा नवा वस्तुपाठ घालून दिला आहे. त्रिमूर्ती मंगल कार्यालयात रंगलेल्या या शिबिरात तब्बल २१०४ नागरिकांनी विविध शासकीय योजनांचा लाभ घेत आपल्या प्रलंबित समस्यांचे निराकरण करून घेतले.
कार्यक्रमाच्या अध्यक्षस्थानी तहसीलदार उत्तम निलावाड होते. यावेळी प्रामुख्याने बीडीओ भीमराव व्हनखंडे, सहा. बीडीओ हेमराज राठोड, तालुका कृषी अधिकारी दिपाली खवले, वैद्यकीय अधिकारी संजय मडावी, भूमी अभिलेख उपअधीक्षक जाधव, नायब तहसीलदार विजय मत्ते यांची उपस्थिती होती.
एकाच ठिकाणी सर्व सेवांचा पाऊस
नागरिकांच्या महसूल विषयक तक्रारींचे जागेवरच निवारण करण्यासाठी प्रशासनाने कंबर कसली होती. शिबिरात डिजिटल स्वाक्षरीचे ७/१२, ८-अ उतारे, फेरफार दुरुस्ती, उत्पन्न आणि जातीचे प्रमाणपत्र अशा सेवा तत्काळ उपलब्ध करून देण्यात आल्या. विशेष म्हणजे, आरोग्य विभागाच्या स्टॉलवर सर्वाधिक १२७५ नागरिकांनी तपासणी करून लाभ घेतला.
निराधार आणि दिव्यांगांना दिलासा
या शिबिराचे मुख्य आकर्षण म्हणजे दिव्यांग आणि निराधार व्यक्तींना मिळालेला आधार. घरकुल लाभार्थ्यांना हक्काच्या रेतीचे पास वाटप करण्यात आल्याने सामान्यांच्या चेहऱ्यावर समाधान ओसंडून वाहत होते.
यावेळी भाजप तालुकाध्यक्ष अविनाश लांबट, शिवसेना (उबाठा) तालुका प्रमुख पुरुषोत्तम बुटे, माजी जि.प. सदस्या अरुणाताई खंडाळकर, उपसरपंच शोभा कालर यांच्यासह महसूल व पंचायत समितीचे अधिकारी-कर्मचारी व पत्रकार बंधू मोठ्या संख्येने उपस्थित होते. कार्यक्रमाचे यशस्वी सूत्रसंचालन आर. डी. कंडाळकर यांनी केले.