शिवसेना (शिंदे गट)तर्फे मुस्लिम महिलांसाठी भव्य इफ्तार पार्टी
सुरेश पाचभाई मारेगाव
मारेगाव शहर हे नेहमीच हिंदू-मुस्लिम ऐक्य, सामाजिक सलोखा आणि बंधुभावाचे जिवंत उदाहरण म्हणून ओळखले जाते. या परंपरेला अधिक बळकटी देत पवित्र रमजान महिन्याच्या निमित्ताने शिवसेना (शिंदे गट)तर्फे मुस्लिम महिलांसाठी भव्य इफ्तार पार्टीचे आयोजन करण्यात आले. या उपक्रमाचे नेतृत्व सौ.चेतना विशाल किन्हेकर यांनी केले.
मारेगाव येथील प्राथमिक शाळेच्या परिसरात आयोजित करण्यात आलेल्या या कार्यक्रमात मुस्लिम समाजातील महिलांनी मोठ्या उत्साहाने सहभाग नोंदवला. रमजान महिन्यातील १८ व्या रोज्याच्या निमित्ताने आयोजित या इफ्तार कार्यक्रमात उपस्थित महिलांनी रोजा सोडून एकत्रित इफ्तार केला.
या प्रसंगी मुस्लिम महिलांकडून नात-ए-शरीफचे पठण करण्यात आले. समाजात शांतता, बंधुता व मानवता कायम राहावी तसेच सर्व मानवजातीच्या कल्याणासाठी विशेष दुआही करण्यात आली. धर्म, जात आणि पंथ यापलीकडे जाऊन सामाजिक ऐक्याचा संदेश देणारा हा उपक्रम उपस्थितांच्या विशेष कौतुकाचा विषय ठरला.
मारेगाव शहरात अशा प्रकारचे उपक्रम सातत्याने होत असल्याने हिंदू-मुस्लिम ऐक्य अधिक दृढ होत असल्याचे मत उपस्थितांनी व्यक्त केले.
या प्रसंगी अॅड. हुमेरा अली, नगरसेविका अंजुम शेख नबी, खैरून शेख, रकिया शेख दिलदार, डॉ. केलोडे, आलिमा मुस्कान शरीफ, फरसेजहा शरीफ, उजमा शरीफ, नगरसेविका सौ. तारा खालिद पटेल, कल्पना ताई गावंडे (महिला तालुका अध्यक्षा), सौ. प्रतिभा झाडे (शहर अध्यक्षा), साधना अस्वले (महिला शहर उपाध्यक्षा), प्रभा ताई ढेंगळे (शहर उपाध्यक्षा), सोनाली शेंडे, कोमल ताई, सारिका चिकणकर, मंदा ताई धोबे यांच्यासह शिंदे गटाच्या महिला पदाधिकारी आणि मुस्लिम समाजातील अनेक महिला मोठ्या संख्येने उपस्थित होत्या.
सामाजिक सलोखा, धर्मनिरपेक्षता आणि परस्पर सन्मानाचा संदेश देणारा हा उपक्रम मारेगावच्या एकात्मतेच्या परंपरेला अधिक बळकटी देणारा ठरल्याचे नागरिकांकडून सांगण्यात आले.
