बातमी ऐका (Marathi Voice Reader)
कोल्हापूरमधील जोतिबा मंदिर येथे भाविकाना पुजाऱ्यांकडून मारहाण केल्याचा धक्कादायक प्रकार समोर आला आहे. या घटनेचा व्हिडिओही समोर आला असून सोशल मीडियावर तो मोठ्या प्रमाणात व्हायरल होत आहे. जोतिबा मंदिर येथे भाविक आणि पुजाऱ्यांमध्ये झालेल्या या वादामागे दोन वेगवेगळी कारणे समोर आली आहेत. मिळालेल्या माहितीनुसार, मंदिर परिसरात गुलाल उधळताना काहींनी नारळ फेकून मारल्याचा प्रकार घडला. या कृत्यामुळे काही भाविकांना त्रास झाला आणि वातावरण तणावपूर्ण बनले. काहींच्या डोक्यालाही नारळ लागल्याची माहिती समोर आली आहे. दरम्यान, दुसऱ्या बाजूने काही हुल्लडबाज तरुणांनी यात्रेदरम्यान गोंधळ घातल्याचेही समोर आले. आरतीच्या वेळी गोंधळ घालणे, पुजाऱ्यांवर गुलाल फेकणे आणि त्यांच्या पारंपरिक टोप्या उडवण्याचे प्रकार करण्यात आले. यामुळे पुजारी आणि उपस्थित कर्मचाऱ्यांमध्ये संतापाची भावना निर्माण झाली. याचे रुपातंर मारहाणीत झाले. मात्र, भाविकांना नेमकी मारहाण कशामुळे झाली, हे अद्याप स्पष्ट झालेली नाही.
या प्रकारामुळे मंदिर परिसरात काही काळ तणावाचे वातावरण निर्माण झाले होते. दरम्यान, एक एप्रिलला होणाऱ्या मुख्य यात्रेच्या पार्श्वभूमीवर ही घटना घडल्याने भाविकांमध्येही भीतीचे वातावरण पसरले. सोशल मीडियावर संमिश्र प्रतिक्रिया या संपूर्ण घटनेचा व्हिडिओ व्हायरल झाल्यानंतर सोशल मीडियावर संमिश्र प्रतिक्रिया उमटत आहेत. काहींनी पुजाऱ्यांच्या वर्तनाचा निषेध केला आहे, तर काहींनी धार्मिक स्थळी हुल्लडबाजी करणाऱ्यांवर कारवाईची मागणी केली आहे.
