बातमी ऐका (Marathi Voice Reader)
भोंदू अशोक खरातची चौकशी करणाऱ्या विशेष तपास पथकाने (एसआयटी) राज्य महिला आयोगाच्या माजी अध्यक्षा रुपाली चाकणकर यांना समन्स बजावला आहे. त्यामुळे रुपाली चाकणकर यांच्यावर चौकशी व त्यानंतर अटकेची टांगती तलवार उभी राहिल्याचा दावा केला जात आहे. सत्ताधारी राष्ट्रवादी काँग्रेसच्या नेत्या रुपाली ठोंबरे पाटील यांनी अशी शक्यता बोलून दाखवली आहे. अशोक खरातशी असणाऱ्या कथित संबंधांवरून रुपाली चाकणकरांना प्रथम राज्य महिला आयोगाचे अध्यक्षपद व त्यानंतर राष्ट्रवादीच्या महिला प्रदेशाध्यक्षपदावरून राजीनामा द्यावा लागला आहे. शिवसेना उद्धव बाळासाहेब ठाकरे पक्षाच्या उपनेत्या सुषमा अंधारे व राष्ट्रवादीच्या नेत्या रुपाली ठोंबरे पाटील यांनी या प्रकरणी नाशिकच्या पोलिस अधिकाऱ्यांची भेट घेऊन रुपाली चाकणकर यांच्यावर गुन्हा दाखल करून त्यांना सहआरोपी करण्याची मागणी केली होती. यामुळे पोलिसांवरील विशेषतः या प्रकरणाचा तपास करणाऱ्या विशेष तपास पथकावरील दबाव वाढला होता. या सर्व पार्श्वभूमीवर एसआयटीने रुपाली चाकणकर यांच्याविरोधात समन्स बजावल्याचे वृत्त टीव्ही 9 या मराठी वृत्त वाहिनीने दिले आहे. या वृत्तानुसार, भोंदू अशोक खरातच्या शिवनिका संस्थान, मिरगाव या ट्रस्टवर सदस्य असल्याप्रकरणी रुपाली चाकणकर यांना हा समन्स बजावण्यात आला आहे. या प्रकरणी या ट्रस्टच्या सर्व आजी – माजी सदस्यांची चौकशी होणार असल्याची माहिती आहे. समन्स बजावला म्हणजे आभाळ कोसळले नाही – बावनकुळे भाजपचे ज्येष्ठ नेते तथा राज्याचे महसूल मंत्री चंद्रशेखर बावनकुळे यांनी या प्रकरणावर आपली प्रतिक्रिया दिली आहे. समन्स बजावला म्हणजे काही आकाश कोसळले नाही. तो चौकशीचा भाग आहे, असे ते म्हणालेत. रुपाली चाकणकर कायद्याने सहआरोपी – रुपाली ठोंबरे दुसरीकडे, राष्ट्रवादी काँग्रेसच्या नेत्या रुपाली ठोंबरे पाटील यांनी प्रस्तुत प्रकरणात रुपाली चाकणकर या कायद्याने सहआरोपी असल्याचा दावा केला आहे. त्या एका मराठी वृत्तवाहिनीशी बोलताना म्हणाल्या, भोंदू बाबा प्रकरणात रुपाली चाकणकर कायद्याने सहआरोपी आहेत. कारण, त्यांचा या प्रकरणात असणारा प्रत्यक्ष हितसंबंध, त्यांनी पोलिसांवर टाकलेला दबाव व त्या स्वतः राज्य महिला आयोगाच्या अध्यक्षा म्हणून त्या ट्रस्टवर होत्या. त्यांचे खरातसोबत अनेक फोटो आहेत. यामुळे महिला अजून विश्वासाने तिथे जात होत्या. या भोंदूबाबाने रुपाली चाकरणकर यांच्याशी कटकारस्थान करून हे रॅकेट चालवले तर नाही ना? असा प्रश्न उपस्थित होतो. या सर्व गोष्टींचा तपास होण्यासाठी खरातच्या ट्रस्टवर जेवढे लोक आहेत, त्यांना सुद्धा कायद्याने सहआरोपी करणे क्रमप्राप्त आहे. राजकारणात आहोत म्हणून उगीच आरोप करायचे म्हणून मी हे आरोप करत नाही. परंतु या प्रकरणाची गंभीरपणे दखल घेतली, तर जवळपास हजार-दीड हजार महिलांचे शोषण झाले असताना राज्य महिला आयोग डोळे झाकून बसल्या होत्या का. त्यांना पुसटशीही कल्पना नव्हती का. त्यांना माहिती होती. त्यांचा या प्रकरणात सहभाग आहे. त्यामुळे जी काही नोटीस दिली आहे, त्यानुसार त्यांचा तपास करून त्यांना आरोपी म्हणून कोर्टात हजर केले जाईल, असे रुपाली ठोंबरे म्हणाल्या.
