बातमी ऐका (Marathi Voice Reader)
नागपूर शहरातील एमआयडीसी पोलीस ठाण्याच्या हद्दीतील अमरनगर परिसरातून संपूर्ण जिल्ह्याला हादरवून सोडणारी घटना समोर आली आहे. इथं एका माजी भाडेकरूने घरमालकासह तिघांवर घरात घुसून तलवार आणि चाकूने सपासप वार केले आहेत. या रक्तरंजित हल्ल्यात घरी पाहुणी म्हणून आलेल्या एका महिलेचा जागीच मृत्यू झाला आहे, तर घरमालक दांपत्य गंभीर जखमी झाले आहे. या संपूर्ण घटनेचा थरार सोसायटीतील सीसीटीव्ही कॅमेऱ्यात कैद झाला आहे.
संगीता चौधरी असं हल्ल्यात मृत्यूमुखी पडलेल्या महिलेचं नाव आहे. तर धर्मपाल डहाट आणि वनिता डहाट असं हल्ल्यात गंभीर जखमी झालेल्या घरमालक दाम्पत्याचं नाव आहे. या प्रकरणी पोलिसांनी माजी भाडेकरू रोशन निळकंठराव तराळ याला अटक केली आहे. जुन्या वादातून भाडेकरू रोशन याने हा हल्ला केल्याची प्राथमिक माहिती समोर आली आहे. या प्रकरणी पोलिसांनी आरोपीला बेड्या ठोकल्या आहेत.
नक्की काय घडली घटना?
मिळालेल्या माहितीनुसार, आरोपी रोशन नीळकंठराव तराळ हा पूर्वी धर्मपाल डहाट यांच्याकडे भाड्याने राहत होता. मंगळवारी आरोपी हातात तलवार आणि चाकू घेऊन अचानक डहाट यांच्या घरात घुसला. त्याने काही समजण्याच्या आतच घरात उपस्थित असलेले घरमालक धर्मपाल डहाट, त्यांची पत्नी वनिता डहाट आणि त्यांच्या घरी पाहुण्या म्हणून आलेली मेहुणी संगीता राजू चौधरी यांच्यावर प्राणघातक हल्ला चढवला.
शस्त्रांनी केलेल्या या भीषण हल्ल्यात संगीता चौधरी यांच्या शरीरातून मोठ्या प्रमाणात रक्तस्त्राव झाल्यामुळे त्यांचा घटनास्थळीच मृत्यू झाला. तर धर्मपाल डहाट आणि वनिता डहाट हे दोघेही या हल्ल्यात गंभीर जखमी झाले. घटनेनंतर जखमींना तातडीने रुग्णालयात दाखल करण्यात आले असून त्यांच्यावर उपचार सुरू आहेत.
रेडिओच्या आवाजावरून झाला होता वाद
आरोपी रोशन तराळ हा पूर्वी डहाट कुटुंबाकडे भाड्याने राहत असताना मोठ्या आवाजात रेडिओ लावण्याच्या कारणातून वाद झाला होता. याच वादातून आरोपीने हे टोकाचे पाऊल उचलल्याची प्राथमिक माहिती समोर आली आहे.
सीसीटीव्हीत कैद झाला थरार आणि आरोपीला अटक
आरोपी हातात धारदार शस्त्र घेऊन घरात शिरतानाचे आणि कुटुंबावर हल्ला करत असल्याचं दृश्य सोसायटीच्या सीसीटीव्ही कॅमेऱ्यात स्पष्टपणे कैद झालं आहे. धक्कादायक बाब म्हणजे, एवढा भीषण आणि रक्तरंजित हल्ला केल्यानंतर आरोपी घटनास्थळावरून पळून न जाता घरातच शांत बसून राहिला होता. घटनेचे गांभीर्य ओळखून स्थानिक नागरिकांनी प्रसंगावधान दाखवत आरोपीला त्याच खोलीत बाहेरून कोंडून ठेवले आणि पोलिसांना माहिती दिली. माहिती मिळताच एमआयडीसी पोलीस ठाण्याच्या पथकाने तातडीने घटनास्थळी धाव घेत आरोपी रोशन तराळ याला अटक केली. पोलीस सध्या या प्रकरणाचा सखोल तपास करत आहेत.
